Situasaun Atuál Obriga Timor Leste Sai husi Normalidade Konstitusionál, Prezidente Repúblika Hahii PNTL

by -314 views

Timor Post (27/03/2021)—Prezidente Repúblika Francisco Guterres Lú Olo subliña, situasaun atuál atake pandemia COVID-19 obriga Timor Leste sai husi situasaun normalidade konstitusionál.

“Ita bá fali situasaun exesaun konstitusionál ne’ebé limita sosiedade nia lala’ok no ita labele ohinloron rekuperasaun ekonómika Nasaun nian,” Lú Olo subliña kestaun ne’e iha nia mensajen ba selebrasaun aniversáriu Polísia Nasionál Timor Leste (PNTL) ba-dala-21.

“Ita hahii PNTL  iha situasaun emerjénsia saúde públika ida nia laran ne’ebé mai hosi pandemia COVID-19,” Lú Olo hatutan.

Entre instituisaun públika sira-ne’ebé hola parte iha luta ida-ne’e, Polísia Nasionál Timor-Leste hamriik iha liña oin hodi tau matan ba ema hotu nia seguransa no saúde.

“Tanba ne’e, ha’u hakarak hato’o ha’u-nia hako’ak boot ba Instituisaun ida-ne’e, ba feto no mane sira hotu ne’ebé loroloron dedika no sakrifika sira-nia an tomak atu garante seguransa no moris-di’ak ba Timoroan sira,” Xefe Estadu hatete.

Lú Olo dehan, aproveita loron aniversáriu PNTL nian hodi saúda PNTL liuhusi Komandante-Jeral Komisáriu Faustino da Costa no Segundu Komandante-Jeral Mateus Fernandes.

Nia dehan, luta hasoru COVID-19 sai hanesan oportunidade di’ak ida atu tetu timoroan-nia reziliénsia nasional hasoru dezafiu boot liu iha Timor-Leste nia istória dezde restaurasaun Independénsia iha 20 maiu 2002.

Luta ida-ne’e oin-seluk. Ita labele hasees ema ida no la iha ema ida bele hasees-an hosi luta ne’e. Tempu to’o ona atu ita hothotu, no ita ida-idak, fó ita-nia kontribuisaun atu hamutuk hakaat liu susar ida-ne’e.  Ita tenke  hamutuk hodi hapara pandemia ida-ne’e no tau aas interese públiku no proteje  Nasaun nia murak boot liu hotu – ita-nia ema – tau aas liu interese rasik no polítiku ne’ebé de’it. Maluk sira ne’ebé iha responsabilidade aas iha ita-nia sosiedade labele haluha no labele halo ema haluha risku  ne’ebé mak asosia ho Covid-19. Sira labele  hasees-an no labele halo ema hases-an hosi medida sira ne’ebé Governu foti atu prevene no hamenus  vírus Covid-19  hada’et husi ema ba ema.

Iha situasaun krize ne’ebé grave, hanesan situasaun pandemia ne’ebé ita hasoru daudaun ne’e, ita tenke halo jestaun ida ne’ebé efikás no efisiente. Nune’e, ita presiza hatene saída mak ita atu halo, halo planeamentu,  organizasaun, asaun no avaliasaun beibeik, no liuliu, ita tenke  foti desizaun oioin ho lailais. Ba ida-ne’e, ita presiza rekursus hothotu, umanus, ekipamentu no orsamentu iha tempu badak nia laran atu nune’e organizasaun no instituisaun sira bele atua kedas.

Sentru Integradu Jestaun Krize – nu’udar estrutura ida ne’ebé harii ho mekanizmu ida ne’ebé iha  komandu, kontrolu no koordenasaun entre instituisaun sira – hatudu dadaun katak bele hatán di’ak ba krize ida-ne’e tanba  la’o tuir kultura koopera malu no  fahe  malu sira-nia rekursus no  sistemas informasaun no komunikasaun.

Luta hasoru krime no aplika lei mak objetivu organizasionál rua hosi polísia sira iha mundu  tomak. Maibé, dezafiu sira-ne’ebé mosu ohinloron  ho pandemia  ida ne’e obriga  polísia  sira muda sira-nia atuasaun. Tanba ne’e   polísia sira iha mundu mós tenke foka liután ba sira-nia knaar nu’udar instituisaun ida ne’ebé dedika-an liuliu ba apoiu umanitáriu maibé la’o nafatin nu’udar instrumentu hasoru krime.

Enkuantu Governu aplika medidas ona atu hamenus Covid-19 hada’et babeibeik, mosu fali  krime ho forma foun iha ita-nia sosiedade:  Krime la kumpre  lei no violénsia oioin, ne’ebé iha relasaun ho jéneru no akontese  mós iha uma laran. Ne’e duni, Forsas no Servisus Seguransa, liuliu Polísia Nasionál Timor-Leste, tenke adapta ninia knaar  ba situasaun foun  ida ne’e.

Ajente polísia la’ós  sidadaun baibain maibé  sidadaun kualifikadu ida no,  nune’e, nia tenke tau matan ba orden públika, tenke iha konxiénsia  katak ninia knaar sosiál importante tebes , hatene simu ho ulun malirin krítika saída de’it  hosi sidadadun sira, no  sai ezemplu di’ak ba sosiedade nu’’ udar sidadaun ne’ebé kumpre mós lei no regras no nune’e bele mós defende dignidade PNTL nian.

Bainhira fiskaliza kumprimentu medidas prevensaun hosi Governu, tenke haktuir  prinsípius Estadu Direitu nian iha kontestu emerjénsia nian, ho maneira ida ne’ebé  hanorin,  informa no orienta ita-nia povu, no  uza de’it  forsa bainhira presiza duni maibé  tuir situasaun ida-idak  ezije no natoon de’it hodi  kontrola kedas.

Haree ba knaar ne’ebé profisionál sira seguransa públika nian hala’o iha liña oin, importante tebes katak imi  iha mós kondisaun servisu  di’ak hodi hamenus risku infesaun. Ida-ne’e ezije halo mudansa ba imi-nia rotina servisu, tenke uza hodi biit  ekipamentu protesaun pesoál, foti medidas seguransa no prepara materiál ba orientasaun.

Pandemia Covid-19 ne’ebé Timor-Leste mós hasoru dadaun muda ona ita-nia moris iha sosiedade.  Derrepente de’it  ita-nia moris baibain muda,  no  ita bele  haree momoos katak ita-na instituisaun no servisu balun , liuliu iha área saúde no seguransa interna seidauk bele hatán di’ak no lalais ba nesesidade ohinloron nian. Situasaun ida-ne’e halo ita preokupa liu kona-ba ita-nia futuru.

Durante pandemia no izolamentu sosiál, liafuan prinsipál  mak solidariedade no konfiansa. Solidariedade katak fó liman ba malu, tulun malu atu ita hotu  bele hakaat risku sira-ne’ebé asosia ho pandemia; ho  situasaun ida ne’e sidadaun sira tenke iha konfiansa  ba instituisaun no haktuir medidas foti hosi Governu.

Iha momentu krize nian, normal katak  sosiedade sivíl reklama atu iha  órden  liután atu hatuur  filafali konfiansa ba sidadaun sira no garante seguransa ba ita-nia ema no ita-nia komunidade.

Maibé tebs mós katak, iha tempu susar isda ne’ mak  sidadaun ida-idak presiza hasa’e as liután ninia devér sira duke reklama direitu sira no hatudu-an  nu’ udar sidadaun ho  valór étiku, ho sivizmu ne’ebé hatene respeita no kumpre  medidas saúde públika hatun hosi Governu.

Iha tempu susar ida-ne’e, ita presiza Polísia Nasionál ida ne’ebé iha motivasaun no preparadu, nakonu ho espíritu serví ho di’ak no banati tuir prátika sira ne’ebé di’akliu hotu  hosi  polísia no seguransa. Ita presiza Polísia Nasionál ida ne’ebé marka prezensa iha liuron,  hatene hakbesik-an ba Povu, hodi defende Povu nia liberdade no nia direitu atu moris filafali ho esperansa.

Ba ida ne’e, kompete ba Estadu nu’udar riin ne’ebé  garante defeza ba sidadaun sira-nia direitus no liberdades, atu rekoñese katak polísia presiza kondisaun ninian duni katak,  ita-nia Polísia Nasionál presiza infraestruturas ne’ebé di’ak, meius operasionais ne’ebé adekuadu, hosi karreta to’o armamentu, hosi ekipamentu hodi apoia atividade polísia nian to’o  estrutura apoiu teknolójiku.

Polísia Nasionál Timor-Leste, nu’udar forsa ida pertense mós ba Estadu hetan konfiansa no respeitu hosi Timoroan sira no ha’u, nu’udar Prezidente Repúblika, sente orgullu tanba haree duni esforsu no   profisionalizmu  ne’ebé  Ita-Boot sira hatudu liuhosi servisu importante tebes ne’ebé Ita-Boot sira hato’o  ona no hato’o dadaun ba ita-nia  Nasaun.

“Timor-Leste konta ho imi hotu, Timor-Leste fó fiar tomak ba imi! Parabéns ho hakoak boot husi Prezidente Repúblika ba imi-hotu no ba família sira! Viva Polícia Nacional de Timor-Leste!,” Lú Olo subliña.  (*/cao)

No More Posts Available.

No more pages to load.