Lere: “Hau Simu Ona Vasina SINOVAC”

by -63 views
Jeneral Lere Anan Timor. (Foto TP/Esp)

(Reporter Jaime Pires/Editor Mariano Martins)

DILI (Timor Post) -Tenente Jenerál Falintil Forsa Defeza Timor-Leste (F-FDTL), Lere Anan Timur, hatete nia parte simu ona vasina SINOVAC, no sira na’in ba ai-moruk “Xina” sei kontente.

Lia hirak ne’e hato’o ba jornalista sira hafoin halo lansamentu vasina SINOVAC iha Kuartél Jenerál Falintil Forsa Defeza Timor-Leste (F-FDTL) Fatuhada, Tersa (15/06).

Nia dehan, antes governu halo lansamentu ba ai-moruk vasina AstraZeneca nia la tuir vasina tanba hakarak hein oportunidade ba vasina SINOVAC nia ne’e.

Nia reforsa, ai-moruk sira ne’e hanesan de’it tanba hotu-hotu kontra virus korona ninia maibé diferente mak naran ida SINOVAC no ida AstraZeneca maibé sira ne’e ida de’it.

“Durante ne’e ha’u mós hein, karik SINOVAC ne’e mak la mai ha’u sei simu AstraZeneca maibé SINOVAC mai ona ne’e oportunidade di’ak ha’u simu ida ne’e”, nia esplika.

Nia hatutan, ai-moruk SINOVAC ho AstraZeneca ne’e iha na’in, ne’ebé simu ona SINOVAC ne’e ninia na’in mak Xina, dala ruma sira kontein tanba Jenerál Timor-Leste bele simu.

Lere subliña, hanesan mós vasina AstraZeneca nia na’in, maibé mundu tomak simu hotu vasina timur tolu ka haat ne’e, ida mak SINOVAC ida mak AstraZeneca no sira seluk tan.

Tanba ne’e, nia laiha intensaun dehan hakarak despreza AstraZeneca no simu SINOVAC, maibé lider sira barak mak simu ona AstraZeneca entaun nia ho Komandante Sabika ho membru sira F-FDTL simu de’it ona SINOVAC.

“Ha’u ohin simu seidauk sente buat ida dala ruma orasida mak sente karik, maibé ha’u rona katak, sira simu ona SINOVAC ne’e dehan orasida balun hamlaha matan dukur, maibé ha’u hakarak ida matan dukur ne’e mak di’ak”, tenik nia.

Tuir observasaun Timor Post nia haree, iha lansamentu vasina SINOVAC iha Kuartél Jenerál ne’e Tenente Jenerál Lere Anan Timor, ho Komandante Sabika, inklui membru F-FDTL sira no mós sidadaun sira balun.(Lee nutisia seluk iha Timor Post)

No More Posts Available.

No more pages to load.