Simu Sinovac, Xanana Subliña Importánsia husi Vasina

by -34 views
Lider Nasionál Kay Rala Xanana Gusmão hatudu kartaun vasinasaun

Jornalista Noémio Falcão

DILI (Timor Post)—Lider Nasionál Kayrala Xanana Gusmão simu ona vasina ho marka Sinovac iha klínika Fatumeta, Dili, Kinta (24/06/2021). Hafoin vasina, Xanana husu ema hotu ba vasina.

“Husu ema ida-idak atu prevene-an hosi COVID-19. Ne’e duni, ha’u husu ba ema hotu-hotu atu hakbesik-an ba fasilidade saúde-sira hodi simu vasina,” Xanana subliña ba jornalista-sira iha Klínika Maternidade Fatumeta.

Xanana dehan, ema barak iha mundu infetadu no mate tanba COVID-19. Nune’e, dalan úniku atu liberta-an husi atake moras ne’e maka ema hotu ba vasina.

Entretantu Primeiru-Ministru, Taur Matan Ruak, kontente ho Xanana nia desizaun ba simu ona vasina motiva liutan sidadaun sira.

“Ha’u kontente loos. Tanba ne’e, fó ezemplu di’ak loos ba iha ita hotu-hotu atu tuir buat ne’ebé Avó Xanana halo hodi kontribui simu vasina,” Taur ba jornalista sira hafoin enkontru semanál ho Prezidente Repúblik, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili.

“Ha’u husu parabéns parabens no obrigadu barak,” Xanana hatutan.

Hafoin akompaña Xanana ba vasina, Diretora Jerál Prestasaun Serbisu Saúde, Odete da Silva Viegas,  agradese ba Xanana tanba simu ona vasina Sinovac doze dahuluk.

“Ami agradese ba Maun boot Xanana, tanba ohin dader bele mai simu ona vasina Sinovac iha Klínika ne’e. Ida ne’e hatudu ezemplu di’ak ba populsaun ne’ebé seidauk simu vasina, atu bele hakbesik-an ba postu vasinasaun iha ne’ebé de’it hodi hetan vasina,” Odete subliña. (Lee notísia kompletu iha Jornal Timor Post)