Sidadaun Sira Hakat Ilegal ba Hasa’e Sintu iha Atambua, Baku Rahun Sasán iha Sentru Kuarentena

by -763 views
Imajen ne’e hatudu entrevista Jornalista ho Komandante Polísia Nasionál Timor-Leste (PNTL) Munsípiu Dili, Superentendente Xefe Henrique da Costa. Foto Espesiál

Jornalista Jaime Pires / Editór Noémio Falcão

DILI (Timor Post)—Sidadaun sira ne’ebé mak hakat ilegal husi fronteira ba hasa’e sintu ka sabuk iha Atambua-Indonézia no autoridade seguransa nasaun viziñu ne’e kaptura haruka fila mai Dili, baku rahun sasan iha Sentru Kuarentena Tasi-Tolu.

Komandante Polísia Nasionál Timor-Leste (PNTL) Munsípiu Dili, Superentendente Xefe Henrique da Costa ba jornalista sira iha nia servisu fatin, Kaikoli, Kinta (26/08/2021) haktuir, nia simu ona relatóriu kompletu kona-ba akontesimentu ne’e husi komandu eskuadra.

“Orentasaun tun ona ba iha komadante eskuadra no parte investigasaun, katak depois sira (autor baku rahun sasan) kumpre tiha loron kuarentena, investigasaun sei la’o,” Komandante Henrique subliña.

Henrique haktuir, polísia foti ona dadus kona-ba sasan sira ne’ebé hetan estragus mak hanesan odamatan haris fatin no kama.

“Sira estraga kama ida no odamatan haris fatin, maibé prosesu investigasaun la’o ba mak ita haree sasan hira mak sira estraga,” Henrique hatutan.

Seidauk bele fó sai ema na’in hira mak halo asaun ne’e iha kuarentena Tasi Tolu.

“Akontese (25/08/2021) maizumenus tuku sia kalan ba leten hanesan ne’e, maibé informasaun agora iha ne’e iha akontesimentu ne’e laiha ema ruma mak kanek,” Henrique salienta.

Antes ne’e Autoridade Seguransa Repúblika Indonézia liuhusi Kapolres Belu, Dandim no Migrasaun, Kinta (19/08/2021), deporta timoroan na’in-352 ne’ebé tama ilegál ba Atambua-Nusa Tengara Timur (NTT). Timoroan hirak ne’e involve iha Grupu Arte Marsiál Persaudaran Setia Hati Terate (PSHT).

Membru hirak ne’e tama ilegal ba Atambua ho objetivu hasa’e sintu (sabuk).

No More Posts Available.

No more pages to load.