Sidadaun 53.000 Simu Ona Vasina AstraZenaka

by -474 views
Ekipa Komisaun Interminiterial ba Implementasaun Vasina Covid-19 deklara rezultadu vasina AstraZenaka husi primeiru lansamentu no segundu lansamentu iha salaun Ministériu Solidariedade Sosiál Inkluzaun (MSSI). (Foto TP/ Olga Soares)

(Reportájen Olga Soares/Editor Suzana Cardoso)

DILI (Timor Post) – Hamutuk sidadaun 53.000 maka simu ona Vasina AstraZenaka dezde hahu lansamentu iha loron 7 Abríl 2021 hosi doze 44.000 ne’ebé Timor-Leste (TL) simu husi doasaun Covax facility no Nasaun Viziñu Australia.

“To’o ohin loron populasaun rihun 53 liu mak simu ona vasina AstraZenaka. Populasaun hirak ne’e simu hosi dose rihun 24 oferese husi Covax facility. No dose rihun 20 seluk oferese husi Austrália. Husi numeru hirak ne’e nain ida mak hetan reasaun grave.”

Esplikasaun ne’e hato’o hosi Portavos Komisaun Interministerial ba Implementasaun Vasina Covid-19, Dra. Danina Coelho, liu husi komferensia imprensa iha salaun MSSI, Kaikoli, Dili, (21/05/2021).

Nia esplika liutan, ema ne’ebé hetan reasaun normal mak hanesan isin manas, ulun moras no seluk tan. Enkuantu ida ne’ebé hetan grave tanba ema ne’e hetan allergia. Ema ne’e antes vasina iha ona moras.

Klasifika Dra. Danina katak, doze dahuluk simu husi sidadaun maizumenus 23.000. Dose daruak ne’ebé apoiu husi Austrália simu husi ema besik 3.000. Governu enkoraja hirak ne’ebé ho moros kroniku no idade 60 ba leten atu simu vasina hodi proteje sira nia-an husi moras todan ne’ebé kauza husi Covid-19.

“Atu hamenus lalais tranzmisaun komunitaria iha Dili, Governu deside halais liu programa vasinasaun. Tanba ne’e, pesoál saúde la’ós fó de’it vasina iha postu saúde, maibé sei hakat ba fatin-fatin. Inklui ba to’o aldeia sira,” deklara Dra. Danina.

Katak Dra. Danina, data statistika ne’ebé Governu iha mak; pursentu 48% husi sira ne’ebé mak simu ona vasina husi grupu prioridade sira. Ho moras komorbidade 6.046 ka 24%. Ema ho tinan 60 ba leten la ho moras komorbidade 1.268 ka 5%. Pesoál liña oin sira 4.555 ka 18%. Pesoal saúde 110 ka 1%. No adultu sira tinan 60 mai kraik la ho moras komorbidade 13.011 ka 52%. Ho total estimadu 19% ema ho idade 18 ba leten iha Dili mak simu ona sira nia dose dahuluk ba vasina Covid-19.

“Maski pesoál saúde halo esforsu tomak maibé planu vasinasaun ladun atinje alvu balun iha primeira faze ho doze dahuluk. Ami enkoraja família sira atu lori lalais maluk ho moras kroniku no otas liu 60 ba sentru vasina hodi simu vasina. Sira bele proteje an ho di’ak liutan. Karik virus Covid-19 da’et ba sira sei la moras todan,” rekomenda Dra. Danina.

Nia esplika, ema idozu no sira ho moras kronika, hanesan tensaun ás, diabetes, moras fuan no moras respiratoria mak risku boot liu atu hetan moras todan no mate husi Covid-19. Tanba ne’e vasina ne’e seguru ba ema idozu sira no sira ne’ebé ho moras kroniku. La iha implikasaun ba kondisaun saúde ema idoso sira nian no nia efeitu adversu mós menus liu atu akontese iha ema ne’ebé idozu ona.

Kazu Konfirmadu Atinji 100 Kada Loron

Iha sorin seluk Diretora Servisu Saúde Munisípiu Dili, Agustinha Segurado reforsa, maioria profesional saúde no liña oin sira simu ona sira-nia vasina doze dahuluk ho iha lansamentu primeira Fulan Abríl. Ema sira ho moras kronika no tinan 60 ba leten mós sai hanesan grupu prioritariu iha 20% tuir planu implementasaun Nasional Vasina Covid-19.

Tuir Agostinha, kampaña vasinasaun iha Dili no munisipu afetadu ho infesaun Covid-19 sei kontinua. Tanba taxa kazu konfirmadu iha Dili kada loron atinji to’o 100-resin. Nune’e, hotu-hotu tenki tuir vasinasaun no halo tuir protokolu Saúde nian mak bele hapara tranzmisaun Covid-19 iha komunidade.

“Husu hotu-hotu nafatin pratika fase liman bebeik, distansiamentu sosiál, uza maskara iha fatin publiku. No evita halibur malu atu hapara tranzmisaun Covid-19. Proteje ita nia membru familia idozu, vulneravel liu ho moras komorbidade. No sira ne’ebé seidauk bele simu vasina iha momentu ne’e,” sujere Agostinha.(Lee Notisia seluk iha jornál Timor Post)

 

No More Posts Available.

No more pages to load.