SFJ-Timor Post Entrega Sertifikadu ba Formandu Na’in-57

by -256 views
Foto Hamutuk

Jornalista Estajiáriu Mariano Do Santos / Editór Noémio Falcão

Dili (Timor Post)— Sentru Formasaun Jornalista-Timor Post (SFJ-TP) entrega sertifikadu ba formadu na’in-57 ne’e kompleta ona formasaun durante fulan tolu.

Formadu ba etapa ikus tinan 2021 durante fulan tolu ne’e kompostu husi mane na’in-38, feto na’in-19.

Formadu sira ne’e inklui foinsa’e na’in-37, na’in-8 nu’udar funsionáriu relasaun públika iha Ministériu Agrikultura no Peskas, na’in-12 husi Ministériu Edukasaun Juvemtude no Desportu,no na’in-2 husi organizasaun naun governamental Ba Futuru.

Iha serimónia entrega no simu sertifikadu iha aula SFJ-TP, Bebora, Dili, Sesta (03/12/2021), Koordenador SFJ-TP, Santina da Costa Araújo haktuir, husi foinsa’e sira kompleta ona formasaun na’in-1 hetan ona kontratu servisu iha RAEOA, na’in-10 kontinua estájiu iha Timor Post inklui na’in-5 iha Jornál, na’in-3 iha Televizaun Timor Post, na’in-2 Online Timor Post no na’in-4 iha Jornal no Online Bussenes Timor.

“Ita hein katak mídia seluk bele uza mos sira,” Santina subliña.

“Formasaun ida ne’e funsiona ho di’ak tebes, ho laran no ho esperiénsia boot ami hakarak hametin no mantein servisu no kolaborasaun di’ak ida ne’e iha futuru, nune’e, bele hadi’ak no hariku koñesimentu no kapasidade Timoroan nian liu-liu iha área jonalizmu,” Santina hatutan.

Entretantu Diretora Timor Post, Suzana Cardoso lori naran instituisaun ne’e agradese ba konfiansa tomak foinsa’e no funsionáriu sira iha instituisaun estadu no sosiedade sivíl sira, kompleta liu tan objetivu SFJ nian ba produz nafatin rekursu iha área komunikasaun sosiál iha rai laran.

“Durante imi ninia formasaun ne’ebé monu iha Timor Post no mos sira iha ne’e sai hanesan formador ba imi, maibé ha’u hakarak hatete katak evaluasaun ha’u haree liu husi imi nia notísia sira, ne’ebé dala ruma fo mai ha’u edit, i depois husi midia offiser sira kapas tebes,”Suzana hatete.

Diretora Suzana husu ba formadu sira atu kontinua apriende iha terrenu no badinas iha instituisaun ne’ebé de’it maka haknaar-an ba atu aplika rejultadu husi formasaun ne’ebé durante ne’e hetan husi formador sira.

Entretantu formandu midia offiser husi MEJD Elias Marques agradese no kontente tuir formasaun iha SFJ-TP hodi kompleta sira nia servisu.

“Enkuanto to’o ona mai SFJ, ita bele hatene katak iha diferente bainhira ko’alia opiniaun ruma, no atu hato’o ita ninia opiniaun ruma, ou hakerek opiniaun liga ho notísia, katak ami to’o ona fatin SFJ mak ami komprende katak iha diferente,” Elias subliña.

No More Posts Available.

No more pages to load.