Servisu Imigrasaun Rekolla Osan Besik Millaun iha Tinan 2020

by -161 views

Timor Post (14/01/2021)-Reseita doméstika hosi Servisu Imigrasaun Timor-Leste iha tinan 2020 hamutuk besik millaun ida.

Diretór Jerál Servisu Imigrasaun, Superintendente Asistente, Luis Barreto hatete, reseita ne’e mai hosi ema tama sai tinan ida nian rekolla hosi fronteira terrestre Portu no Aeroportu.

“Ema tama hamutuk 52,392, no sai ne’e hamutuk 52,634 mak sai. Reseita ne’ebé mak ami konsege hatama iha tinan 2020 kuaze millaun ida resin”, Luis Barreto informa ba Jornalista sira iha edifísiu Ministériu Interior, Villa-Verde, kinta (14/01).

DJ hatutan osan millaun ida resin ne’e rekolla hosi postu fronteira sira ne’ebé mak iha hanesan, Batugade, Salele no Sakato, inklui atendimentu iha diresaun jerál hamutuk ho Aeroportu no mós Portu.

Ema ne’ebé tama sai ilegalmente Imigrasaun simu iha tinan 2020 hamutuk 58 kompostu hosi mane 47 no feto 11, maioria timoroan de’it.

Entretantu nia kompara, reseita tinan 2020 ne’e menus ho tinan 2018 no 2019 tanba estadu emerjénsia no ema maioria tama ho livre vistu mak barak.

“Tinan 2018 no 2019 ita rekolla reseita ne’e hosi millaun tolu to millaun lima, maibé tinan 2020 ne’e menus tuna ba millaun ida de’it tanba, estadu emerjénsia ema tama maioria ho livre vistu”, tenik Nia.(Jornalista: Jaime Pires, Mariano Martins)

No More Posts Available.

No more pages to load.