Servisu iha Área Fábrika no Peskas: Timoroan Na’in-60 Aranka ba Korea-Súl

by -2.094 views
Foto Midia SEFOPE

Jornalista Jaime Pires / Editór Noémio Falcão

DILI (Timor Post)—Sekretaria Estadu Formasaun Profesional no Empregu (SEFOPE) liuhusi Diresaun Nasionál Empregu Externu (DNEE), Kinta (21/10/2021) haruka tan timoroan na’in-60 ba servisu iha Korea Sul.

Timoroan na’in-60 ne’e la inklui feto tanba área servisu ne’ebé kompañia sira iha Korea husu fábrika no peskas de’it.

Diretór DNEE, Filomeno Soares bá jornalista sira iha Aeroportu Nicolau Lobato, Komoro-Dili subliña, traballadór sira agora ba ne’e, kontratu tinan tolu fulan lima kleur liu mak tinan haat fulan ualu sira tenke fila fali mai ona.

“Temporamente mane hotu de’it feto la iha tanba area servisu ne’ebé mak agora daudauk iha korea fó ne’e presiza mane de’it, hanesan servisu peskas no enjinaria ne’e,” Diretor Filomeno haktuir.

Nia dehan, traballadór sira 60 ne’e mos kompostu husi traballadór tuan sira ne’ebé mak antes ne’e sira ba uluk ona inklui mós foun.

“Depois sira kuandu ba to’o Korea sira sei hetan tan kuarentena durante 14 dias, depois de ne’e mak sira foin tama servisu,” nia hatutan.

Nia esplika rekezitus ne’ebé governu korea fó maka, antes traballadór atu aranka ba Korea Súl, sei tuir teste PCR KOVID-19 rezultadu hatudu negativu, depois sei halo karantina durante loron ida maka sei aranka ba korea súl, no ba to’o iha korea sei halo tán karantina durante loron sanulu-resin-haat, maka ida-idak foin ba ninia kompaña hodi hala’o servisu.

Iha biban ne’e mós Sekretáriu Estadu Formasaun Profisionál no Empregu Alarico de Rosário husu ba traballadór sira, ba servsiu atu nafatin halo komunikasaun ho familia, liu-liu fen ho oan, nune’e bele haruka osan mai hodi sustenta sira, no mós husu ba família atu utiliza osan ne’e hó didi’ak.

Governate ne’e mós husu ba traballadór sira atu bele kumpri promesa ne’ebé halo ona, katak ba servisu labele ses a’an husi sistema ka ilegál, tanbá komete ilegál sei taka dalan ba maluk joven Timor-oan sira ne’ebé hein hela atu ba servisu.

Entretantu traballadór na’in neen-nulu (60) ne’e, kompostu husi re-entri na’in sanalu-resin-sia (19), área fábrika na’in sanulu-resin-ne’en (16), no área peskas nain na’in ruanulu-resin-lima (25).

No More Posts Available.

No more pages to load.