SEP Hato’o Progresu Servisu Delegasaun Territorial

by -21 views
SEP Elídio de Araújo hamutuk ho diretór jerál no nasionál sira hala’o enkontru aprezenta progresu servisu delegasaun territoriál nian hosi diresaun peska. (Foto SEP/António de Oliveira)

DILI (Timor Piost) — Atu dezenvolve setór agrikultura no peska ho di’ak liutan iha futuru, maka presiza koopera no apoiu tékniku sira hodi halo peskiza no fornese informasaun sientífiku balu hodi apoiu desizaun sira.

“Aproveita oportunidade ne’e ho di’ak, hodi elabora no diskute asuntu relevante hotu ne’ebé tékniku sira rekolla iha terrenu. Nune’e ita bele asegura atividade sira ne’e atu fó benefísiu povu iha futuru.”

Lia fuan hirak ne’e kasu husi Sekretáriu Estadu no Peska (SEP), Elídio de Araújo iha ninia intervensaun iha workshop aprezentasaun progresu servisu delegasaun territoriál nian hosi diresaun peska, iha salaun Ministériu Agrikultura no Peska iha Komoro, foin lalais ne’e.

Workshop ne’e lidera husi SEP, Elídio de Araújo ne’ebé akompaña hosi Gabinete Diretór Jerál Peska, Agrikultura no Rekursu Mariñu (PARM), Diretór Nasionál Inspesaun Peska, Diresaun Nasionál l Jestaun Rekursu Pesqueiros (DNGRP) no Diresaun Nasionál l Aquikultura no Salikultura (DNAS).

Iha workship ne’e SEP Elídio husu ba Xefe Departamentu Peska territorial atu presiza koopera no apoiu tékniku sira hodi halo peskiza no fornese informasaun sientífiku balu hodi apoiu desizaun atu dezenvolve setór agrikultura no peska ho di’ak.

Portantu iha okaziaun ne’e, reprezentante Xefe Departamentu munisipais agradese ba esforsu hotu hosi ekipa ne’ebé kompostu hosi tékniku kolektór data ninia kolaborasaun durante ne’e, hodi oferese dadus no elabora proposal kona-ba ikan hodi entrega ba Diresaun Jerál Péska nian.

Iha biban ida ne’e, Diretór Inspesaun Péska, Lourenço dos Reis Amaral, agradese ba tékniku sira, liu-liu tékniku data kolektor sira nia servisu hodi apoiu dezenvolve setór peska no agrikultura ho sira nia dadus adekuadu.

No, Sekretáriu Estadu Peska iha ninia polítika atu dezenvolve área agrikultura no peska hodi garante seguransa ai-han no nutrisaun ba ema hotu. (pj16)

 

No More Posts Available.

No more pages to load.