Sente Laiha Identidade, Demostrasaun iha UNTL

by -2.465 views
Foto TP: Jaime da Costa

Jornalista Cardenio Alves / Editór Noémio Falcão

Dili (Timor Post)—Estudante Universidade Nasional  Timor Loronsa’e (UNTL), husi Fakuldade Edukasaun no Arte Umanidade  (FEAH sigla Portugués) halo asaun hodi ezije sira nia fasilidade.

Estudante sira ezije liuliu almamater no kartaun estudante ne’ebé too agora universidade seidauk prepara ba sira.

Asaun protestu ne’e hala’o iha loron Kinta (18/11/2021) iha resintu UNTL sentral, Dili.

“Ami husu ba universidade atu atende direitu ne’ebé ami husu ba fasilidade iha universidade nian ne’ebé ladauk kompletu,” hatete Lazaro Boavida nu’udar Senadu Fakuldade FEAH.

Lázaro subliña, fasilidade rua ne’ebé sira ezije mak hanesan identidade estudante sira nian, bainhira laiha maka sira labele ba tuir semináriu ka atividade extra sira ne’ebé bele kompleta sira nia matenek iha banku universitáriu.

“Ne’e problema sériu tebes, tanba la’ós foin fulan ida ka rua ba estudante sira, maibé problema ida ne’e tinan tolu ona ba estudante sira hasoru,” Lázaro haktuir.

“Loloos ami nia asaun ba ezijénsia sira ne’e, ami atu realiza konsiden ho loron dez-natalis UNTL, maibé tanba ho razaun estrutura lalin malu ba sentraliza fali sira nia festeza dez-natalis iha Hera, entaun ami laiha transporte atu mobiliza masa ba to’o Hera,”  Lázaro hatutan.

Total estudante ne’ebé sai hanesan vítima ba fasilidade kazaku almamater no kartaun estudante hamutuk rihun tolu, ladauk konta hotu husi fakulda valu ne’ebé iha UNTL ne’e rasik,  maibé husi fakuldade FEAH, de’it ho turnu 2020/2021 ninian,

Nia dehan, asaun ida ne’e foin inisia husi fakuldade edukasaun, karik asaun sira ne’e mak laiha resolusaun ruma husi estrutura relevante.

“Ami hein iha loron tolu ba desizaun husi UNTL katak laiha duni, asaun sei mai ho bo’ot liu-tan, no sei mobiliza masa fakuldade hotu-hotu,” Lázaro afirma.

Too notísia ne’e públika Jornalista Timor Post seidauk halo konfirmasaun ho parte kompetente kona-ba rajaun saida maka durante tinan hirak nia laran seidauk prepara almamater no kartaun identidade ba estudante sira.

No More Posts Available.

No more pages to load.