Selebra Loron Proklamasaun Independénsia iha Ermera, Horta: “Ha’u Sempre Halo Diskursu Badak”

by -736 views
Eis Prezidente Repúblika José Manuel Ramos Horta

Ermera (Timor Post)—Eis Prezidente Repúblika José Manuel Ramos Horta selebra loron proklamasaun independénsia ba-dala-46 hamutuk ho autoridade no populasaun Rai Laku-Munisípiu Ermera.

Hafoin rona tiha diskursu Prezidente Repúblika Francisco Guterres Lú Olo ne’e lee husi autoridade fatin ne’e, Horta hetan mos oportunidade nu’udar eis órgaun titular iha nia intervensaun hatete, durante nia mandatu sempre halo diskursu badak.

Ho diplomasia, Horta fó rajaun halo diskursu badak tanba preokupadu ho forsa, polísia no populasaun sira hamriik kleur iha loron manas laran.

“Entaun ha’u halo ha’u nia diskursu badak. Ne’e duni agora rona tiha ona diskursu prezidente nian, ha’u labele ko’alia naruk,” Horta hatete.

Iha intervensaun ne’e, Horta espresa de’it nia laran kontente selebra loron istóriku ne’e iha Rai Laku.

“Ha’u uluk kedas sempre hanoin, Rai Laku-Ermera, Ainaro bele sai hanesan jona turítiku ke di’ak tebtebes. Tanba ita haree klima di’ak tebtebes. Kafé la’ós sai tós ekonómiku de’it, sai atraksi turístiku ida maka’as,” Horta subliña.

Tanb ane’e, Horta espera populasaun Ermera hanesan populasaun husi munisípiu seluk ne’ebé kafé iha labele so’e tiha tanba liu tinan atus ona, tradisaun halo parte ona istória, ekonomia boot Timor Leste nian.

“Mina bele hotu, osan boot mai husi ita nia joven sira ba Korea, Irlanda no Inglaterra. Iha fatin balu bele haree joven bele ba tan hanesan Alemaña,” Horta subliña.

No More Posts Available.

No more pages to load.