Sekretáriu Estadu Veteranus Preokupa OJE 2021 Seidauk Tama ba Konta Ministériu, “Hanesan Militár iha Kilat Laiha Musan”

by -10 views
Sekretariu Estadu Assuntu Antigu Kombatente no Libertasaun Nasionál, Gil da Costa Monteiro 'Oan Soru'. Foto TATOLI

Timor Post (03/03/2021)—Sekretariu Estadu Assuntu Antigu Kombatente no Libertasaun Nasionál, Gil da Costa Monteiro ‘Oan Soru‘ hatete, to’o agora nia parte seidauk bele halo buat ida tanba Orsamentu Jerál Estadu (OJE) 2021 nian seidauk tama iha konta ministériu nian.

Oan Soru dehan, kestaun ne’e prejudika tebes atividade ka programa sekretáriu estadu nian ne’ebé propoin ona iha OJE 2021 nian inklui halo verifikasaun ba dadus veteranu sira nian.

“Agora daudaun ministériu seidauk halo buat ida. Ein prinsípiu orsamentu operasionais sira ne’e seidauk mosu iha ministériu nia konta bankária, entaun ministériu labele halo buat ida ho liman mamuk,” Oan Soru subliña ba Timor Post via telefone, Segunda (01/03).

Nune’e, Oan Soru dehan, osan laiha ne’e hanesan militar ida karik ba halo funu kilat musan laiha.

“Hanesan militár ida karik nia atu ba funu presiza iha kilat no kilat musan, kuandu laiha nia ba inimigu tuku de’it nia liman hadau nia kilat,” Oan Soru salienta.

Relasina ho kestaun ne’e, estudante husi Universidade Nasionál Timor Lorosa’e (UNTL), Vitór Fernandes hatete, ministériu hotu-hotu presiza osan hodi halo sira nia programa.

“Sé osan laiha konserteza programa la halo, ne’e Primeiru Ministru presiza rezolve,” Vitór subliña.

Entretantu polémika kona-ba OJE 2021 kontinua. Primeiru Ministru Taur Matan Ruak ho Ministru Finansas rasik hatete, seidauk iha nesesidade ba levantamentu OJE tanba osan restu husi 2020 nian sei naton hela ba uza iha inísiu fulan tolu tinan ne’e nian.

Maske nune’e, parte opozisaun defende katak presiza governu halo ona levantamentu hodi ministériu ida-idak realiza ona planu no programa ne’ebé propoin ona iha OJE 2021 nian.

Biar nune’e, Primeiru-Ministru Taur Matan Ruak husu dala ida tán ba públiku atu lalika preokupa ho levantamentu OJE 2021 tanba Governu mak hatene katak iha nesesidade atu halo ona levantamentu ka hein lai.

“Ha’u hanoin ita-boot sira rona demais sira iha li’ur, la rona Governu ne’e. Fila ba fila mai ita-boot sira preokupa dehan Governu osan laiha. Ami mak kaer dapur ne’e loloos ne’e ami mak dehan hahán laiha ona ka sei iha. Ita-boot sira hán ne’e mak preokupa la halimar ne’e. Maibé prontu, hakarak hateten, informasaun ne’ebé ha’u simu hosi Ministériu Finansa katak seidauk iha nesesidade atu halo levantamentu, maibé kuandu nesesidade obriga sei halo. Tanba ne’e lalika preokupa ho ida ne’e,” Primeiru-Ministru dehan.

Antes ne’e, Minisru Finansas Rui Gomes hatete, governu halo levantamentu OJE 2021 iha fulan Fevereiru.

Iha momentu ne’e Ministru Finansa, Rui Gomes informa, sei iha saldu rezerva tokon $230,

Iha parte seluk, MInistru Prezidénsia Konsellu Ministru Fidelis Manuel Leite Magalhães hatete, governu labele foti lai osan ne’e iha banku tanba sei buka hela osan funan.

Entretantu Parlamentu Nasionál aprova tiha ona OJE 2021 hamutuk bilaun $ 1,895 iha Dezembru tinan kotuk.

Deklarasaun ne’e hetan kedas reasaun makas husi sosiedade sivíli no jurista sira tanba OJE 2021 nian aprova atu foti ba ejekuta. Jurista Manuél TIlman dehan, deklarasaun Fidelis nian laiha baze fundamental.

Jornalista Venidora

Editór Noémio Falcão