SEFOPE Asina Deklarasaun ho Família Traballadór Na’in 23 Atu Arranka ba Austrália

by -1.362 views
Traballadór na’in 23 foto hamutuk afoin asina deklarasaun ho SEFOPE, hodi ba servisu iha Austrália. Imajen TP/mariano abi

(Reportajen Estaziadu Mariano Abi/Asistente Editor Hermenegildo da Costa Tilman)

Dili (Timor Post)- Sekretariadu Estadu Professional no Empregu (SEFOPE) liu husi Diresaun Nasionál Empregu Exterior (DNEE), ohin, asina deklarasaun ho família traballadór na’in 23 ne’ebé aban (30/3), sei arranka ba servisu iha Australia.

“Ohin serimónia asina deklarasaun ho família traballadór na’in-23, atu ba servisu iha nasaun Austrália, traballadór sira ne’e sei arranka ba Austrália aban kinta loron 30 fulan ne’e, ba etapa dahuluk nian,” Diretór DNEE, Filomeno Soares, dehan iha Salaun DNEE, Bekora, Tersa (29/03).

Nia hatete, serimónia asina deklarasaun ida ne’e parte ida hosi rekizitu ne’ebé maka kandidatu traballadór ida tenke kumpre. Asina deklarasaun ne’e mós sai hanesan kometimentu ida katak, inan-aman no família prontu ona husik sira-nia oan, la’en-fen husi sira nia le’et atu ba servisu iha ema nia rain

“Bainhira atu aproveita oportunidade sira ne’e, traballadór sira tenke kumpre rekizitu balun hodi asegura sira, atu nune’e, servisu iha Australia ho di’ak, tanba prosesu haruka traballadór sira ba servisu iha rai li’ur, la’ós prosesu fasil,” nia afirma.

Enkuantu, traballadór sira ne’ebé atu arranka ba Austrália ho totál ema na’in-23, kompostu husi traballadór foun na’in-5 no traballadór tuan na’in-18 hosi total ne’e iha feto na’in-4 no mane na’in-19.

Traballadór sira ne’e sei destaka ba Kompaña, Freshwater Quality Management ho totál ema na’in-6, feto na’in-4 no mane na’in-2, Costa Farm ho totál ema na’in-12, kompostu husi mane hotu, Brockfield ho totál ema na’in-5 kompostu husi mane hotu, traballadór sira ne’e destaka iha area Hortikultura no Area Hospitalidade.

Reprezentante traballadór, Armindo Pinto Ribeiro, hatete, nia kontente tanba pasa husi programa Sezeonal Worker no bele ba servisu iha Austrália.

“Objetivu ha’u nian mak atu hadi’a família uma laran nian, kontinua estudu no ajuda alin sira ba eskola,” nia deklara (Asesu Notisia Seluk Iha Jornal Timor Post/ Asesu You Tube Timor Post)

No More Posts Available.

No more pages to load.