SEAK Apoiu Uma Lisan Haat Iha Manufahi

by -176 views
Responsavel SEAK Manufahi, Celestino da Silva Mendes Sarmento. Foto TP/Luis Casimiro Lopes

MANUFAHI (Timor Post)—Responsavel Sekretáriu Estadu Arte no Kultura (SEAK) Munisípiu Manufahi, Celestino da Silva Mendes Sarmento, hateten, iha tinan 2021 SEAK apoiu uma lisan haat (4) no grupu ida iha munisípiu Manufahi.
“Uma lisan haat ne’e kompostu husi ida iha postu Turiskai, Same rua, Alas uma lisan ida no grupu arte kultura”, hatete Celestino Mendes iha salaun administrasaun munisípiu Manufahi, Kinta (30/09).
Uma lisan hirak ne’e hetan apoiu tanba proposta ba konstrusaun uma lisan passa iha SEAK.
Enkuantu proposta hosi grupu arte nian iha tinan 2020 no pasa iha tinan 2021 total orsamentu hamutuk dollar rihun rua resin.
“Ami husu nafatin ba lia na’in no grupu arte sira hotu atu hatama proposta no uma lisan no grupu ne’ebé hetan ona apoiu ami sei halo monitorizasaun” apela Celestino.
Laiha Edifísiu no Fasilidade
Responsavel SEAK iha munisípiu Manufahi, Celestino da Silva Mendes Sarmento aprezenta ba komisaun G ne’ebé trata asuntu edukasaun, juventude, komunikasaun no arte kultura hafoin halo fiskalizasaun ba orsamentu 2021 iha munisípiu Manufahi katak la iha edifísiu no fasilidade.
“Ami iha ema na’in tolu maibé susar atu halo levantamentu dadus, patrimóniu, no sosializasaun ba patrimóniu ba postu adminsitrativu Turiskai, Alas, Same no postu administrativu Fatuberliu tanba laiha transporte”, aprezenta Celestino.
Nia hatutan, tanba durante ne’e laiha fasilidade transporte atividade balun realiza iha postu labele partisipa.
“Ami laiha orsamentu operasionál, materiais ba eskritóriu no laiha kamera hodi halo dokumentasaun baihira halo levantamentu ruma iha tereinu, ne’e duni fasilidade zero”, tenik responsavel.
Tanba edifísiu própriu la iha durante ne’e SEAK Manufahi uza hela sala ida husi edukasaun munisípiu Manufahi maibé pesoál funsionáriu rekruta aumenta no fatin atu hodi halo serbisu la sufisiente.(lcl)

No More Posts Available.

No more pages to load.