Saudozu Ma’Huno nia Isin Mate Lori Sai ona husi Muzeum Rezisténsia

by -4.647 views
Foto TP: Jaime Pires

Jornalista Jaime Pires / Editór Noémio Falcão

DILI (Timor Post)—Saudozu José António Gomes da Costa  alias Ma’huno Bulerek Karathayano nia isin mate lori sai ona husi fatin maktoba Muzeum Rezisténsia ba Katedral, Dili hodi hala’o misa solene.

Tuir programa funeral ne’ebé hala’o ohin, Tersa (28/09/2021), tuku 08:30-09:30, estadu no família lori sai mate isin husi Muzeum Rezisténsia ba Katedral; tuku 09:30-11:00 sai husi Katedral ba Manatutu-Laleia hodi hala’o serimónia kultural; tuku 14:00-16:00 sai husi Laleia ba Jardin Eroi i Mártires da Pátria Metinaro hala’o serimónia funeral.

Sai husi Muzeum Rezistésia akompaña husi Sekretáriu Estadu Antigus Kombatentes Libertasaun Nasionál, Gil Oan Soru ho Sekretáriu Estadu Protesaun Sivíl, Joaquim Gusmão. To’o iha Katedral simu husi Ministru Asuntus Kombatentes Libertasaun Nasionál, Meta Malik.

Partisipa iha selebrasaun misa ne’ebé diriji husi Padre Parókia Motael, Padre Guilermino da Silva ne’e, Premiadu Nobel da Paz, José Manuel Ramos Horta, Maijor Jeneral FALINTIL-Forsa Defeza Timor-Leste (F-FDTL), Tenente Jeneral Lere Anan Timur ho nia Vise Maijor Jenerál Falur Rate Laek, Komadante Polísia Nasionál Timor-Leste (PNTL), Munisípiu Dili, Superentendente Xefe Henrique da Costa ho nia adjuntu komadante.

Observasaun Timor Post hatuir, maioria partisipa iha selebrasaun misa ne’e offisial no membru F-FDTL no PNTL, veteranu no família sira.

Ma’huno hakotu iis iha Hospital Nacional Guido Valadares (HNGV) iha loron Sesta lorokraik (24/09/2021).

Ma’huno  moris iha loron 14 Abril 1949. Nia nu’udar FALINTIL ne’ebé hamutuk ho Komandante Ein Xefe Kayrala Xanana Gusmão konsege lidera funu to’o Timor Leste hetan libertasaun husi okupasaun Repúblika Indonézia.

Ma’huno nu’udar atual Vise Prezidente Dahuluk Partidu Kongresu Nasional Rekonstruksaun Timorense (CNRT).

No More Posts Available.

No more pages to load.