DILI(TimorPost)—Pasiente sira ne’ebé ba halo tratamentu saúde iha Hospital Nasional loron ba loron kontinua halerik ba ai-moruk maibé parte Hospital la preokupa ho problema sira ne’e maibé kontinua haruka pasiente sira ba sosa iha klinika privadu sira.
Hospitál Nasionál Guido Valadares (HNGV), hanesan Hospital ne’ebé boot liu iha Timor Leste maibé kiak tebes ai-moruk atu atende ba pasiente sira.
“Ai-moruk diabetes laiha, simbastetic kolesterol laiha, Vitamina B1 no B6 laiha, ami povu hakarak konsulta maibé ai-moruk laiha”, tenik Pasiente ne’ebé tranfere hosi Munisipíu Likisa, Maria Feliciana da Costa, ba Jornalista hafoin konsulta iha HNGV, Kuarta (31/05).
Nia hatete, antes ne’e nia halo konsulta iha Likisa maibé tanba ai-moruk laiha entaun mai konsulta iha HNGV, maibé iha HNGV mos ai-moruk laiha.
“Ai-moruk laiha entaun obrigatóriu tenke sosa iha klínika privadu sira maibé osan atu foti iha ne’ebé agora ai-moruk sosa kada tablet ida ho folin 4 USD, ha’u hein mate de’it ona tanba ai-moruk laiha”, nia ho oin triste.
Nu’udar komunidade ne’ebé moris ho kondisaun ekonomia kiik, nia hakarak halo konsulta iha HNGV tanba HNGV publiku ne’ebé ema hotu bele asesu ba, maibé realidade ne’ebé akontese hospital nasional ne’e rasik krize tebes ai-moruk.
Ho problema ida ne’e, nia husu ba governu atu rezolve uluk problema ai-moruk, tanba aimoruk importante ba ema nia vida.
“Ami husu ba Governu ukun karik ukun ho didi’ak haree difikuldade povu nian liu-liu ai-moruk iha hospital atu nune’e povu mai konsulta karik bele simu ai-moruk ba nia saúde”, tenik nia.
Iha fatin hanesan, Diretora Servisu Apoiu Diagnostiku Terapiutiku (SADT), iha Hospital Nasionál Guido Valadares (HNGV), Mingota da Costa Herculano, rekonese dauduan ne’e ai-moruk iha HNGV liu-liu aimoruk vital, Esensial no Nesessaaria stock laiha duni ona.
Nia hatete, tuir loloos ai-moruk hanesan Vital, Esensial no Nesessaaria stock labele mamuk, liu-liu ai-moruk vital ne’e importante ba pasiente nia saúde.
Nia espera ba oin parte relevante sira bele rezolve lalais povu ninia preokupasaun hirak ne’e.
“Ita nia hakarak ne’e ai-moruk tenke iha karik laiha ne’e afeta ba atendimentu, espera katak lian ki’ik oan agora ko’alia hela ne’e bele to’o parte leten ne’ebá para buka solusaun “, nia espera.
Entretantu, Ministra Saúde (MS), Odete Maria Freitas Belo informa, nia parte simu ona pedidu husi Servisu Autonomu Mediku no Ekipamentu Saúde (SAMES) hodi kompras ai-moruk maibé sei haree fundu covid-19 nian.
“Ha’u simu pedidu ne’e ona, ami prepara hela sei enkontru ho jestaun fundu Covid-19 bainhira iha aseitasaun ruma para uza orsamentu para kompras ai-moruk presiza preoara didi’ak ai-moruk saida de’it ita presiza uza orsamentu Covid-19 nian”, dehan Ministra Saúde, Odete Maria Freitas Belo.
Nia hatete, Ministériu Saúde presiza tan orsamentu purvolta 2 ka 3 millaun para kompleta ai-moruk ida-ne’ebé falta iha SAMES no HNGV.
777 total views, 3 views today
