Dili (timorpost.com) – Ministériu Saúde halo konsultasaun públiku nivel instituisaun estadu nian, kona-ba Prosesu Adezaun Timor-Leste iha Organizasaun Mundiál Komérsiu (OMK) ho tema “Organizasaun no regulasaun sistema nasionál Saúde Timor Leste nian”.
“Ohin husi liña Ministeriál sira ne’ebé kompostu husi Diretór Jerál Komérsiu sira, asesór tékniku ne’ebé hola parte, atu nune’e bele halo konsultasaun públiku ba nivel instituisaun estadu ba adezaun Timor-Leste nian ba iha Organizasaun Mundial Komérsiu (OMK)”, diskursu Vise Ministru Saúde, Bonifácio Mau-Coli dos Reis, iha Palásiu de Sinzas Kaikoli, Sesta (11/11).
Nia dehan, adezaun Timor-Leste nu’udar membru OMK la’ós buat simples hanesan iha Organizasaun Mundial Saúde, tanba ne’e hot-hotu tenke armoniza esforsu multi-setoriál hodi asegura katak ba setór ida-idak prepara duni atu tama ba Organizasaun boot ida ne’e.
“Ita hotu tenke preparadu liután bainhira ita tama hodi bele aguenta ba responde ezijénsia ka regra husi OMK ne’ebé prejudika ita-nia dezenvolvimentu ekonómiku nian, no bainhira ita rona OMK haree maka komprivenda bens no produtus, maibé sira-nia kna’ar importante atu apoiu nasaun sira hodi define polítika no regula sira-nia komérsiu no mós suporta sira-nia negósiu durante prosesu negosiasaun no administrasaun kona-ba curs entre nasaun no membru sira inklui disputers kuandu akontese problema ruma”, nia hateten.
Nia hatutan, agora mundu tomak rekoñese setór saúde nu’udar setór sósiu ekonómiku fundamental ba seguransa dezenvolvimentu nasaun sira hotu nian, signifika katak atu prienxe kuidadu saúde ho kualidade ita defende ba komérsiu,” katak nia.
Nia haktuir, atu esplika di’ak liután sira ka hot-hotu nia hanoin hodi prienxe servisu ne’ebé di’ak liután ba populasaun no konklui mós ba saúde mundiál mak hanesan tuir mai ne’e, infraestrutura báziku asesu ba Bee-Moos, Saneamentu no Eletrisidade fó espasu ba kuidadu husi serve tempu Profisionál sira hotu, fatin no ambiente ne’ebé fó konfiansa ba nia povu no vizitante husi rai li’ur hodi minimiza moras oioin ba vizitante sira, inklui funsionáriu sira hotu.
“Tanba ne’e saida mak ita bele hetan bainhira Timor-Leste tama iha OMK, ita bele hetan bens material no servisu husi nasaun membru sira ho presu justu, ita-nia rekursu umanu saida mak bele kompete ho profisionál saúde sira husi rai li’ur no sira mós bele hetan asesu ba empregu iha nasaun OMK iha kondisaun hanesan”, nia informa.
Iha fatin hanesan, Diretór Gabinete Lisensiamentu no Rejistu Atividade Saúde, Carlito Correia Freitas, afirma atividade ohin ne’e Ministériu Saúde organiza enkontru konsultasaun atu bele fahe progresu, ne’ebé durante ekipa tékniku hala’o ona ba prosesu adezaun preparasaun sira ne’ebé iha, to’o ona iha ne’ebé, ba iha dirijente hotu no iha Ministériu Saúde hodi bele apar.
“Ita hotu hatene katak Rai ne’e mudansa polítika ne’e sei akontese iha tinan oin, enkuantu Ema balun ne’ebé ladún hatene Asuntu ne’e karik sira tenke mai iha ne’e para sira halo kedas ba kestaun sira ne’e. Tinan oin mai sira balun keta sai fali boot karik sira hatene di’ak kona-ba Asuntu Adezaun ba OMK”, nia hateten.
Nune’e nia dehan, ohin husi ekipa Traballu halo aprezentasaun atu bele konsulta ho Ministériu Saúde liuliu dirijente sira. Alende ne’e aprezenta mós saida maka hanesan oferta preparasaun MS nian hodi prepara kontribui iha Adezaun ba OMK.
1,852 total views, 3 views today
Bele hare Video Seluk :