DILI (timorpost.com) — Prezidente Repúblika (PR), José Ramos Horta, Tersa (04/09), hasoru malu ho médiku espesialista na’in-3 Giorgio Rocca, Andrew Marc Hammond, PhD no Federico Guelpa, husi kompañia Biocentis hosi Imperial College United Kingdom hodi ko’alia, kona-ba Timor-Leste nia problema saúde.
“Objetivu hasoru prezidente maka potensiál ne’ebé atu ajuda Timor-Leste liuliu ba problema saúde ne’ebé hasoru hanesan moras Denge, nune’e ami mai hodi bele ajuda,” Chief Executive Officer, Giorgio Rocca, dehan hafoin enkontru ho Xefe Estadu, Iha Palasiu Prezidensiál Bairru-Pité, Tersa (04/10).
Giorgio Rocca, hatutan aban Grupu Biocentis sei hasoru Ministériu Saúde (MS), atu nune’e sei ko’alia barak ho Ministériu Saúde (MS) no orasida lokraik hasoru mós Organizasaun Mundiál Saúde (OMS).
Depois hasoru MS ho OMS, sira sei haree uluk lai Timor-Leste nia kapasidade liuliu iha parte Governu kona-ba oinsá maneira kombate moras Denge.
“Nune’e ami sei rona husi parte Timor nia parseiru sira ne’ebé durante hamutuk ho Governu para halo kombate Denge, nune’e ami sei rona uluk husi MS atu nune’e saida mak ami bele halo,” Giorgio Rocca dehan.
Iha fatin hanesan, Andrew Marc Hammond, PhD nu’udar Head of Research & Development haktuir, kampaña Biocentis lori teknolojia ne’ebé bele redús mosquito ne’ebé mak hamosu Denge Fiber.
“Ami husi kompañia Biocentis, mai uza ami nia teknolojia ne’ebé bele redús mosquito ne’ebé hamosu denge fiber, posibilidade ami bele koneksaun data no estuda informasaun husi Governu Timor nian hodi nune’e bele uza teknolojia ne’e ka lae,” relata.
Kona-ba uza teknolojia ne’e ka lae Saúde Públiku mak sei haree no sei fó suporta ba MS karik sientista sira ne’e uza duni teknolojia ne’e ba redús moras ne’e.
Problema Denge, hanesan problema saúde public ne’ebé emerjénsia liuliu iha nasaun Timor fulan hirak liu ba, ne’e duni konvida ami mai para haree teknolojia ne’e, atu implementa hodi bele redús Denge iha Timor. Nia haktuir.
“Ne’e duni Prezidente ohin dehan depois sei halo ajenda ba sira ne’ebé responsavel ou hatene liu kona-ba kajú Denge iha Timor ne’e liuliu MS ho OMS, atu nune’e aban ka orasida lokraik ami ba aprezenta, hodi halo diskusaun kona-ba ninia kontinuasaun halo nusa,” Andre hakotu.
3,062 total views, 3 views today
Bele hare Video Seluk :