ADVERTISEMENT

PM Taur Preokupa Mákina Fase Ran iha HNGV Avaria

Mario da Costa - Saude
Reportajen : Mariano Abi
Editor : Mario da Costa
  • Share
Primeiru Ministru, Taur Matan Ruak, Imajen TP/Mariano Abi

DILI (Timor Post) — Primeiru Ministru (PM), Taur Matan Ruak, preokupa ho mákina fase ran iha Hospital Nasionál Guido Valadares (HNGV), avaria.

“Mákina fase ran iha HNGV, ha’u mós haree iha média”, nia hateten hafoin enkontru ho Prezidente Repúblika, José Ramos Horta, iha Palásiu Prezidensiál, Bairru-Pite, Kinta (01/09).

ADVERTISEMENT
SCROLL FILA BA NOTISIA

Tanba ne’e, nia dehan, sei buka konfirma liuliu husu informasaun ba Ministériu Saúde, hodi haree saida mak bele ajuda.

Xefe Governu mós subliña, naturalmente ne’e sei verdade, katak Timor-Leste nia mákina sira at hotu ne’e prejudika ba pasiente sira.

“Entaun ha’u sei buka hatene, saida mak ha’u bele ajuda,” Xefe Governu, Taur Matan Ruak afirma tan.

Portantu antes ne’e tuir informasaun hosi Jornál Timor Post, katak pasiente hamutuk 95 sofre moras Hemodialisa ne’ebé presiza fase raan rotina, labele para loron ida hanesan ne’e, kuandu para loron ida ne’e bele ameasa ona ba sira-nia vida moris, maibé durante semana ida ona pasiente sira la fase raan, tanba mákina RO Filter ba bee nian mak avaria.

Pasiente fase raan, Pasiente Octávio dos Santos, hatete moras ida fase raan ne’e tenke halo rotina hanesan baibain, semana ida da-rua ou da-tolu, maibé agora semana ida ona sira la fase raan, tanba ne’e husu ba HNGV atu buka meius oinsá bele rezolve problema refere.

Lee Mós:
Hadau Malu Rai Ai-meti Laran, UNIJMA Informa ba PM Taur

 “Ami fase raan ne’e kada semana ida da-rua ou da-tolu, maibé ohin la fase ne’e, ami labele demora tan, tanba ne’e mak ami husu se bele karik rezolve lalais ba, tanba ami-nia vida moris depende ba fase raan”, Pasiente Octávio dos Santos, hato’o preokupasaun ne’e ba jornalista sira iha sala fase raan HNGV, Kinta (01/09).

Nia hatete, tuir loos mákina avaria hanesan ne’e, sira tenke buka meius oinsá atu lori sai pasiente sira ne’e, ba halo tratamentu iha fatin seluk, labele demora fali hanesan ne’e.

Kuandu dada ba tan hanesan ne’e, sira bele mate hotu ona, tanba sira-nia vida moris depende ba fase raan.

“Ha’u fase raan iha 2014 tinan ualu atu ba tinan sia ona, ne’ebé tenke fase hela de’it, ne’ebé la fase liu dala tolu, entaun ne’e bele afeta sa’e ba ulun, kuandu sa’e ona ba ulun ne’e ami ko’alia hanesan ema bulak no hein atu mate de’it ona”, nia preokupa.

Tanba ne’e pasiente sira husu ba Ministériu Saúde ho HNGV foti desizaun lalais hodi bele rezolve sira-nia preokupasaun sira ne’e lalais, labele demora tan to’o segunda.

Entretantu Reprezentante povu iha Parlamentu Nasionál liuhosi bankada apoiu Governu preokupa atendimentu iha Hospital Nasionál Guido Valadares (HNGV) liuliu mákina fase raan nian aat semana ida ona.

“Ha’u hakarak hatene ohin dadeer san ha’u simu telefone katak, mákina fase raan avaria kuaze semana ida ona, entaun sira la fó atendimentu ba pasiente sira”, Deputada Fretilín, Helena Martins, hato’o preokupasaun ne’e iha plenáriu PN, Kuarta (31/08).

Lee Mós:
PNTL Aplika Swab Auto Stop

Tanba ne’e hakarak husu ba Ministra no Diretór atu oinsá buka dalan lalais no urjente hodi transfere pasiente sira ne’e ba halo tratamentu iha Kupan no Bali.

“Ha’u konsege kontaktu duni ho Diretór nia parte rekoñese katak loos”, nia haktuir.

Nia haktuir, Ministériu saúde tenke halo prosesu ne’e lalais, tanba ne’e asegura vida. Presiza mós hadi’a jestaun atendimentu iha HNGV nian liuliu pesoál seguransa nian.

“Ha’u rasik kontaktu ho Diretór, maibé nia dehan kompañia sira mak rekruta ema, maibé sira nia liafuan hasoru ema ladi’ak mak loro-loron mosu dizentendimentu, ha’u rasik ba ne’ebá mós hasoru”, nia hateten.

Hatán ba preokupasaun pasiente fase raan sira nian, Diretór Ezekutivu HNGV, Alito Soares, informa atendimentu iha Sentru Hemodialisa nian kona-ba fase raan ne’e, mákina ne’ebé dada bee ne’e mak avaria.

“Iha loron 31 Agostu lokraik, ita iha problema kona-ba mákina ne’ebé transfer bee ba fase raan ne’e nian iha problema, ne’ebé ita labele kontinua prosesu fase raan”, Alito informa.

Iha momentu ne’ebá pasiente na’in-12 ne’ebé la konsege fase raan, tanba iha problema mákina, komesa hosi horisehik no ohin mós solusaun seidauk iha.

“Ami bolu kompañia ne’ebé durante ne’e instala mákina fase raan iha ospitál, inklui tékniku sira ne’ebé toma konta ba mákina ne’e haree ona, maibé presiza troka mákina ida filtru ne’e, tanba mákina ida ne’e Timor-Leste laiha, iha momentu ne’ebá kedas Hospital koordena kedas ba kompañia, kompañia hato’o kedas ba Jakarta, tanba sasán iha Jakarta mak iha, ne’ebé ita esforsu hela”, dehan Alito.

Lee Mós:
PM Taur Bandu Eis Titulares no Membru Governu Simu Subsídiu 200 USD

Horisehik no ohin dadeer staff ne’ebé servisu iha Embaixada Timor-Leste nian iha Indonézia ne’ebá, inklui komunika adidu Ministériu Saúde nian.

Atu bele haruka mákina ne’e tuir aviaun mai Timor, tuir informasaun ne’ebé Hospital simu tarde liu aban sei to’o Timor no aban to’o instala kedas.

Hein katak prosesu fase raan la’o hanesan baibain, ida ne’e Hospital nia esforsu.

Aleinde ne’e Ministériu Saúde liuhosi Diretora Jerál Prestasaun Saúde, Odete da Silva Viegas, hatete kona-ba mákina filtru bee nian mak avaria ne’ebé informa ba Adidu MS nian iha Indonézia sosa haruka ona aban to’o ona iha Timor.

“Mákina dada bee nian ne’e avaria no informasaun tama ona iha Jakarta, aban to’o iha Dili ona, ita-nia tékniku sira halo kedas instalasaun no prosesu fase raan la’o fali hanesan baibain”, Odete responde.

 1,096 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “PM Taur Preokupa Mákina Fase Ran iha HNGV Avaria” A few seconds ago
  • Share
ADVERTISEMENT
SCROLL FILA BA NOTISIA


Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error: