Saúde Baukau Rejista Pasiente Covid-19 Na’in 154

by -176 views
Foto Google

BAUKAU (Timor Post) – Servisu Munisipál Saúde liuhusi director servisu municipal relata katak tuir relatóriu husi SIJK pasiente kovid-19 hamutuk ema na’in 154 mak izola hela iha fatin izolamentu eis SPK, Gor, Reamari no Casa Coures.

“Ita iha 154 kazu, iha GOR iha pasiente 64, eis SPK 34, iha Riamare eis edifísiu sentru saúde Riamare 30 no iha casa Coures iha ema na’in 15”, dehan director SMS Baukau, Domingos Reinaldo Guterres ba Timor Post Sesta feira (27/08) iha nia knar fatin.

Nia esplika entre pasiente kovid-19 atus ida lima nulu resin hat, kompostu husi na’in atus ida tolu nulu resin sia populasaun bai-bain ho idade husi 0-60 ba leten, enkuantu na’in sanulu resin lima professional saúde ne’ebé mak durante ne’e atende populasaun afetadu sira kompostu husi feto sanulu resin rua mane na’in tolu.

Nia afirma professional na’in sanulu resin lima ne’ebé afeta pozitivu kovid-19, professional saúde sira ne’ebé hala’o sira ninia knar iha terenu ba foti swab, sala izolamentu no husi laboratóriu HoREX Baukau tanba loron-loron sira halo kontaktu direita ho pasiente.

“Entre pasiente pozitivu 154 ne’e iha mós ita nia professional na’in 15 mak hetan pozitivu iha loron 25 semana ne’e, iha feto 12 no mane 3, sira ne’e hetan afeta tanba loron kalan sira kontaktu hela de’it ita nia komunidade afetadu, depois parte balun sira hasoru sampel iha laboratóriu komu sira preokupa liu entaun sira mós hetan afeta”, dehan Domingos

Bainhira jornalista sira tenta konfirma ba koordenadór téknika SIJK munisípiu Baukau, maibé rejeita fó informasaun ho razaun la klaru.(gut)

No More Posts Available.

No more pages to load.