SASCAS Lansa Livru Matadalan Auditoria Sosiál

by -260 views
Ekipa hosi SASCAS no Fongtil foto hamutuk hafoin lansa livru Matadalan Auditoria sosial, iha Salaun FONGTIL, Kaikoli, Tersa (22/02), Foto TP/mariano Abi

(Reportajen Mariano Abi/Editor Mateus da Cruz)

Dili (Timor Post) – Servisu Apoiu Sosiedade Civil no Auditoria Social (SASCAS), lansa livru matadalan auditoria sosiál, livru ne’e atu bele tulun lori benefísiu di’ak ba komunidade sira.

Diretór Ezekutivu SASCAS, Filipe da Costa, hatete, livru ne’e kontinuasaun hosi livru matadalan primeiru volume ne’ebé consultant ida maka hakerek, nune’e iha livru matadalan segundu volume ne’ebé lansa daudaun halo melloramentu barak liután iha laran tanba prepara hosi observadór rasik.

“hanesan Diretór Ezekutivu SASCAS, ha’u hakarak fó parabéns ba ekipa timoroan ne’ebé i prepara matadalan ida ne’e ho di’ak, no espera katak, ita bele implementa, serbisu Auditoria Sosiál ne’e, tuir livru matadalan ne’e nune’e bele lori benefísiu ba komunidade,” nia dehan iha Salaun FONGTIL, kaikoli, Tersa (22/02).

Nia hatete, benefísiu husi livru ne’e bele fasilita komunidade hato’o sira nia hanoin ba rede Auditoria Sosiál, husi rede ne’e bele elabora rekomendasaun sira hodi hato’o ba governu no ba instituisaun relevante sira inklui mós ba Parlamentu Nasionál, nune’e ikus bele fó benefísiu direta ba povu.

“Ita durante ne’e apoiu, saida maka movimentu sira halo, SASCAS la mendikte katak, imi tenke halo agrikultura ka imi tenke halo edukasaun, maibé ita apoiu movimentu ka asoens sira ne’ebé sosiedade sivíl sira halo,” nia relata.

Iha sorin seluk reprezentante Diretór ezekutivu interna FONGTIL, Lorenso Titu esplika, livru ne’e importante tebes atu tulun komunidade sira, tanba livru ne’e hakerek bazeia ba esperiénsia ne’ebé maka Timor Leste no nasaun sira seluk iha, hanesan iha India no indonézia.

“transformasaun ne’e tenke ba iha komunidade, tanba komunidade mak sentidu no sira maka sai na’in ba Auditoria Sosiál, Ha’u foti ezemplu ida kona ba Edukasaun Inkluzivu, ne’ebé maka ema ho Defisiénsia, presiza oportunidade bele eskola, maibé realidade hare iha terrenu katak, sosiedade sira ne’e la asesu ba, ne’ebé livru ne’e maka ajuda, atu sai na’in ba programa Auditoria Sosiál,” nia hakotu. (Lee notísia seluk iha jornál Timor Post/asesu YouTube Timor Post)

No More Posts Available.

No more pages to load.