Sarani Protestante Presiza Mantein Protokolu Saúde

by -118 views
Igreja Evanjélika Asembleia de Deus Timor-Leste. (Foto Google)

DILI (Timor Post) — Igreja Evanjélika Asembleia de Deus Timor-Leste (IEATL) nafatin mantein atividade misa domingu, tanba ne’e ezije sarani protestante ida-idak atu kumpre nafatin regra husi Covid-19 nian.

Prezidente IEATL, Pastor Francisco dos Reis, hatete virus foun naran delta katak iha Timor-Leste iha na’in-hat, maibé nu’udar fiar na’in ba maromak no maromak nia mizerikordia nia ajuda ema liuhusi saúde, liuhusi Na’i ulun sira-nia orientasaun ba sidadaun hotu halo tuir regra sira ne’e, no simu vasina hodi hasa’e imunidade, tanba ne’e iha estadu emerjénsia laiha konfinamentu obrigatóriu, igreja hala’o nafatin nia atividade relijioza la’o hanesan baibain.

“Ami kumpre mak buat sira regra ne’e, fase liman, distánsia no uza máskara la’o nafatin, igreja ami halo kultu hanesan baibain domingu, domingu”, Pastor Francisco hatete ba Timor post liu hosi telefone, Kinta (29/07).

Nia dehan, misa domingu ne’e dala-rua, atu haree ba distánsia, atividade joven igreja sei para lai, kultu halibur malu inan sira-nian sidauk hala’o no eskola dominical seidauk hala’o, tanba labarik sira dala-ruma la uza máskara, haree ba situasaun normal kontinua la’o.

Atu garantia saúde ba sarani sira, igreja kontinua kumpre regra sira no orientasaun husi estadu nian tuir vasina haruka povu tuir vasina, tanba vasina sarani sira simu balu hetan reasaun maibé laiha ema ida mate.

Tuir prezidente katak, maromak husik moras pesti ne’e mai, tanba mundu ne’e nia sala barak liu ona, nasaun sira boot-boot la tuir ona maromak nia dalan no doutrina.

“Maromak ne’e ita la haree, mais maromak ita rona nia futar liafuan ne’e, liuhusi pastor sira,” nia hatete.

Ikus liu, nia dehan, igreja baibain nafatin husu sarani hotu nia konxiénsia atu kumpre regra sira, no hadomi malu, serbí ba malu, tanba ne’e maromak hatudu nia mezirekordia liuhusi igreja no estadu, tanba estadu mak tau ba igreja hodi lori povu ba moris di’ak. (61L)

 

No More Posts Available.

No more pages to load.