Saldu Rezerva Tún ba Tokon $230, Fevereiru maka Governu halo Levantamentu ba OJE 2021

by -61 views

Timor Post (25/01/2021)—Durante fulan janeiru governu gasta hela osan rezerva. Nune’e to’o ohin, Ministru Finansas Rui Gomes informa, saldu tún husi tokon $325 ba tokon $230. Tanba ne’e, iha fulan Fevereiru nia laran nia parte halo levantamentu ba Orsamentu Jerál Estadu (OJE) 2021.

Hafoin enkontru semanal ho Primeiru Ministru, Taur Matan Ruak, iha iha Palásiu Governu, Dili, Rui Gomes subliña, tuir prosedimentu, Ministériu Finansas mak komunika ho Banku Sentral Timor Leste (BCTL sigla Portugués) nune’e bele foti osan husi Banku Federal Amérika (BFA).

“Ami sei kontaktu Banku Sentral (BCTL) iha Fulan Fevereiru nia laran hodi halo levantamentu,” Rui Gomes hatete.

Entretantu, iha loron 07 janeiru 2021, governu liuhusi konsellu ministru públika regra ezekusaun OJE ba tinan fiskál 2021 ho númeru 1/2021, 8 janeiru.

Diploma ne’e aplika orsamentu ba órgaun no servisu administrasaun sentrál, Rejiaun Administrativa Espesiál Oé-cusse Ambeno (RAEOA) no seguransa sosiál, ne’ebé permite garante kontrolu orsamentu efetivu no rigorozu no iha tempu hanesan bele simplifika prosedimentu ezekusaun orsamentál, kontinuidade mudansa iha tinan 2020, hanesan objetivu atu fasilita ezekusaun OJE 2021 husi órgaun no servisu setór administrasaun públika.

Jornalista: Jaime Pires

No More Posts Available.

No more pages to load.