Rogério Lobato To’o ona Dili, Alkatiri Rejeita Moras no Aranka ba Portugal

by -6.845 views
Imajen ne’e hatudu Rogério Lobato ko’alia ho jornalista sira noa akompaña husi Eis Vise Ministru Saúde Luis Lobato, família no kolega sira. Foto Espesial

Dili (Timor Post)—Eis Ministru Interior Rogério Tiago Lobato durante ne’e ba hala’o tratamentu saúde iha rai liur too hikas iha Dili iha loron 29 Dezembru 2021.

Tún husi aviaun iha Aeroportu Internasional Nicolau Lobato, Komoro-Dili, família no kolega sira simu Rogério ho ksolok boot no tara tais.

Hafoin komprementa ho família no kolega sira, Rogério hetan kedas entrevista ho jornalista sira liga ho nia durante iha rai liur no situasaun polítika rai laran.

Rogério dehan,  kona-ba eleisaun prezidensial nia rasik seidauk deside apoiu sé, maibé bainhira Xanana Gusmão maka kandidata-an maka nia fó apoiu total.

“Ha’u seidauk apoiu sé. Xanana kandidatu ha’u fó apoiu, sé nia apoiu ema seluk ne’e oin seluk ona,” Rogério hatete.

Iha oportunidade, liga mós ho debate anterior no Sekretáriu Jerál FRETILIN, Marí Bim Amude Alkatiri rasik hatoo ona keixa ba Ministériu Públiku kona-ba akuzasaun husi Rogério rasik katak Alkatiri mos iha kazu Skylight iha tinan 1978 hodi oho Nicolau Lobato, Rogério hatan de’it katak, husu to’ok ba Alkatiri tanba-sá Alkatiri fó  rekoñesimentu ba Alarico Fernandes ne’ebé akuzadu nu’udar autor ba oho Nicolau Lobato.

“Ha’u hakarak nia (Alkatiri) atu responde de’it mai ha’u dehan, nia fó rekoñesimentu ba Alarico Fernandes 33 anos depoiz de Alarico Fernander traisaun nian ne’e loos ka la loos,” Rogério sublliña.

Entretantu iha loron hanesan Marí Alkatiri aranka ho aviaun ba Portugal ho rajaun ba vizita no festa hamutuk loron boot ho família no kolega sira. No rejeita informasaun iha publiku katak moras.

“Ha’u agora ba Portugal tanba família barak iha ne’ebá ho ha’u nia oan-mane ida de’it mak ne’e, ho ha’u nia mane-foun, ba para hamutuk iha festa pasajen tinan foun nian no ha’u mós iha amigu barak iha ne’ebá,” Alkatiri subliña molok semo ho Aviaun AirAsia husi Aeroportu Internasionál Nicolau Lobato, Komoro-Dili. (cao)

No More Posts Available.

No more pages to load.