Rogério Lobato ho Madre Guelhermina mosu iha Serimónia Tomada Posse ba Estrutura JFP-ADDD Xanana-Ramos

by -3.642 views
Foto TP: Jaime Pires

Jornalista Jaime Pires / Editór Noémio Falcão

Dili (Timor Post)—Eis Komandante FALINTIL Rogério Tiago Lobato atual membru husi Partidu FRETILIN ho Madre Gulhermina da Silva marka mos prezensa iha serimónia tomada posse ba estrutura Junta Forsa Polítika-Aliadu Defende Direitu Demokrátiku (JFP-ADDD) alias XA-RA (Xanana-Ramos).

JFP-ADDD nu’udar movimentu ne’ebé fó apoiu ba kandidatura Prezidente Repúblika José Manuél Ramos Horta ba periodu 2022-2027.

Iha serimónia tomada posse ne’e, Rogério Lobato hamriik hamutuk ho Ramos Horta iha oin hodi asisti juramentu husi estrutura JFP-ADDD Munisípiu Lautem, Baukau, Vikeke, Manatutu, Manufahi, Kovalima, Ainaro, Bobonaru, Ermera, Likísa, Aileu, Dili no Oe-Kusi.

Serimónia tomada posse ne’e hala’o iha iha Salaun Katedral, Dili, Sesta (14/01/2022).

Rogério Lobato nu’udar membru ida iha FRETILIN ne’ebé kontra maka’as Sekretáriu Jeral FRETILIN Marí Bim Amude Alkatiri.

Rogério defende mudansa radikal iha FRETILIN tanba konsidera FRETILIN durante lideransa Alkatiri hatudu sinál negativu tebes.

Rogério mos akuza Alkatiri mos iha operasaun Skylight hodi oho Prezidente Nicolau Lobato tanba fó rekoñesimentu ofisial ba Alarico Fernandes ne’ebé agora iha hela Indonézia ne’ebé konsideradu nu’udar autór prinsipal husi operasaun iha momentu ne’eba.

Entretantu Prezidente Repúblika Francisco Guterres Lú Olo iha loron 6-7 janeiru 2022, rona ona partidu polítiku sira ho asentu iha Parlamentu Nasionál hodi hatene sira-nia hanoin kona-ba data eleisaun prezidensiál ne’ebé sei akontese, pelu menus, loron neen nulu, molok Prezidente atuál ramata ninia mandatu iha 20 maiu 2022.

Prezidente Repúblika hala’o knaar ne’e tuir artigu 12 husi Lei númeru 7/2006, 28 dezembru, ho alterasoins susesivas ba Lei ne’e, katak, molok dekreta data eleisaun, tenke rona uluk Governu no partidus polítikus ho asentu iha Parlamentu Nasionál.

Iha oportunidade, Prezidente Repúblika apela ba partidu polítiku hotu-hotu atu kontinua kumpre nafatin medidas prevensaun ba Covid-19 tanba eleisoins prezidensiais sei akontese iha tempu ne’ebé mundu enfrenta dadaun variante foun, Omicron.

Partidu sira asentu iha Parlamentu Nasionál inklui Partido Democrático (PD), Partido da Libertação Popular (PLP), Frente Mudança (FM), Frente Revolucionária de Timor-Leste Independente (FRETILIN), Partidu Unidade Dezenvolvimentu Demokrátiku (PUDD), Congresso Nacional para a Reconstrução de Timor-Leste (CNRT), Kmanek Haburas Unidade Nasional Timoroan (KHUNTO) no União Democrática Timorense (UDT).

Molok halo enkontru ho líderes partidus polítikus sira-nian, Prezidente Repúblika rona tiha ona Governu, liuhusi Primeiru-Ministru, Jeneral Taur Matan Ruak no Ministru Administrasaun Estatal Miguel Carvalho.

Prezidente Repúblika rona mós Comissão Nacional de Eleições (CNE) no Secretariado Técnico de Administração Eleitoral (STAE) kona-ba preparativus ba eleisaun prezidensiál 2022.

Ba eleisaun prezidensiál tinan ne’e, númeru sentru votasaun no estasaun votu sei aumenta iha territóriu Timor-Leste tomak. Ba eleisaun antesipada 2018, iha sentru votasaun 885. Ba eleisaun prezidensiál 2022, sentru votasaun sei aumenta ba 1200. Númeru estasaun votu sei aumenta husi 1260 (iha 2018) ba 1500, iha tinan 2022.

Hasa’e númeru sentru votasaun no estasaun votu permite hakbesik liután fatin votasaun ba eleitór sira no nune’e, maioria ho otas 17 ka liu, ne’ebé rejista iha STAE, bele ezerse sira-nia direitu atu hili Prezidente Repúblika ba mandatu 2022-2027. Nune’e, taxa partisipasaun eleitór sei sa’e iha eleisaun tuir mai.

Ho númeru sentru no estasaun barak liu, númeru votante iha fatin ida-idak sei menus. Tanba buka hamenus númeru eleitór halibur iha fatin ida, Governu Timor-Leste foti medida di’ak ida atu proteje mós ita nia ema husi vírus moras Covid-19 nian, ne’ebé sei la’o nafatin iha mundu, ho variante oioin.

No More Posts Available.

No more pages to load.