Ró Berlin Ramelau Sei Halo Operasaun iha Dezembru, Ministru José Kestiona Prosesu Manutensaun ba Nakroman

by -810 views
Ro Berlin Ramelau

Jornalista Jaime Pires / Editór Noémio Falcão

DILI (Timor Post)—Tuir planu Ministériu Transporte no Komunikasaun, ró ho marka Berlin Ramelau to’o iha Dili iha fulan Novembru no sei halo operasaun ba mai Dili-Oekusi-Ataúro iha fulan dezembru tinan 2021.

Ministru Transporte no Komunikasaun (MTK), José Agostinho hatete, bainhira Berlin Nakroman to’o iha Dili sei halo preparasaun sira kuaze semana hirak no tama kedas ba operasaun.

“Ro ne’e kuandu laiha mudansa nia sei to’o iha ne’e iha loron 11 Novembru, maibé iha buat balun sei halo entaun nia serteza atu to’o iha ne’e iha meiadu fulan Novembru ne’e,” Ministru José bá Jornalista sira iha Palásiu Governu, Dili, Kuarta (13/10/2021).

Ró Berlin Ramelau fábrika iha Xina. Iha inísiu fulan ne’e lansa ona ba tasi laran hodi halo instalasaun ba ekipamentu eletróniku.

Bainhira lansamentu ró ba tasi laran, Prezidente APORTIL hatete, ró ne’e sei to’o iha Dili iha fulan setembru liu ba, maibé to’o agora seidauk no Ministru Agostino dehan sei to’o iha fulan Novembru tinan ne’e.

Entretantu governante ne’e kestiona prosesu rehabilitasaun ba ró Berlin Nakroman ne’ebé paradu hela durante fulan hirak ikus ne’e.

“Ha’u sei bolu prezidente APORTIL atu nune’e oinsá atu bele aselera prosesu ida ne’e, ha’u nia orentasaun, enkontru ho sira beibeik maibé prosesu ne’e mak lentu,” Ministru José kestiona.

Nia husu APORTIL atu aselera prosesu manutensaun ba Nakroman.

“Iha semana kotuk liubá ha’u orientá ona Diretor Nasionál Transporte Marítima no Prezidente APORTIL atu nune’e bele haree konektividade via Maritima entre Dili Ataúru no Dili Oe-Kusi ninia, hodi antisima movimentu populasaun nia iha loron Finadu ne’e,” nia subliña.

Maske nune’e, Ministru José dehan, to’o ohin loron seidauk fó solusaun ruma kona-ba asuntu ne’e.

No More Posts Available.

No more pages to load.