Rítmu Vasina iha Timor Leste, Doador Internasional Neen

by -589 views
Dadus husi Ministériu Saúde

DILI (Timor Post)—Primeiru Ministru, Taur Matan Ruak hatete, rítmu vasinasaun iha Timor Leste hatudu sinál di’ak tanba justifika ho dadus sidadaun hamutuk millaun 1,112,380 mak simu ona vasina kontra Covid-19.

Liuhusi diskursu iha uma fukun Parlamentu Nasionál debate estensaun estadu emerjensia (EE) ba dala-18, Taur subliña, maski ekipa implementasaun sira hasoru difikuldade barak iha terrenu maibé programa nasionál ba vasinasaun nian kontinua la’o.

“Iha loron 07 fulan-setembru kotuk, ita simu dozes vasinasaun kontra Covid-19 nian ho total 1,112,380 (Milhão ida, rihun atus-ida sanulu resin rua no atus tolu ualu-nulu), fornese husi sistema COVAX no husi país amigu sira hanesan, Austrália, Xina, Japaun, Nova-Zelándia no Portugál,” Taur haktuir, Tersa (28/09/2021).

Vasina barak mak programada atu to’o, inklui vasina Pfizer doze dahuluk ne’ebé atu vasina ba labarik no joven sira ho idade entre tinan 12 to’o tinan 17.

“Ita atinje ona rezultadu di’ak husi inokulasaun vasina doze dahuluk nian ne’ebé to’o loron 21 fulan-setembru abranje besik 77,7% husi populasaun munisípiu Dili no 57,6% husi populasaun nasionál”, tenik Nia.

Tanba ne’e, nia fiar katak, ho ritmu vasinasaun ne’ebé rejistadu, númeru husi ema inokulada sira ho vasina doze daruak ne’ebé kontinua aumenta, mantein viavel no konretizavel objetivu vasina 80% husi populasaun elejivel sira iha Timor-Leste to’o tinan ne’e remata.

Ritmu ezekusaun husi planu vasina nian ne’ebé di’ak permite atu hapara limitasaun no restrisaun graduál sira hodi impede propagasaun vírus iha tirreitóriu nasionál no normalizasaun progresiva ba realizasaun atividade sosiál no ekonómika sira iha ita-nia país. Daudaun ne’e Governu promove atu reabertura fazeada ba ensinu prezensiál iha munisípiu Dili, maske nune’e ba mós kontinua atenta ba evolusaun situasaun no prontu atu atua bainhira iha nesesidade.

Liuhusi Parlamentu Nasionál, Governu reafirma no renova kompromisu atu kontinua haloos medida sira kombate COVID-19 nian iha situasdaun pandemia ne’e, tuir dadus sira ne’ebé rekolle no ho rekomendassaun sira ne’ebé emite ona husi entidade kompotente sira kona-ba saúde públika.

Ita dezeja katak filafali ba normalidade bele hala’o ho seguru no konsistente, fiar katak susesu ba ezekusaun Planu Vasinasaun nian sei reprezenta oportunidade foun hodi hasa’e limitasaun no restrisaun sira ne’ebé sei iha no kontinua fila-fali dalan kreximentu ekonómiku ne’ebé ita liu ona iha tinan 2019 tanba kauza husi pandemia.

Bazeia ba presupostu sira-ne’e maka Governu elabora proposta lei Orsamentu Jerál Estadu nian ba tinan 2022, atu submete ba Parlamentu Nasionál tuir prazu legál sira ne’ebé prevee, no sei impulsiona ho loloos prosesu kreximentu no dezenvolvimentu ekónomia ne’ebé ita-hotu hein no sei sai fundamentu hodi asegura ita-nia povu nia bein-estár no hadi’a sira-nia kondisaun moris.

Governu iha konsiénsia katak situasaun atúal hanesan risku ida husi faze prezensa variante Delta virus SARS-Cov-2 nian iha teritóriu nasionál, nune’e la’ós tempu hodi hamamar medida sira ne’ebé adota ona, maibé la’os mós tempu atu dezanima!

Timor Leste la’o iha dalan lo’os, ita hatene katak, vasinasaun mak instrumentu ne’ebé efikás liu hodi prevene no kombate kazu sira ne’ebé grave liu hosi moras no ita kontinua investe maka’as iha vasinasaun ba populasaun tomak hodi bele simu vasina.

Hatudu liután nesesidade kolaborasaun no koperasaun tantu iha nivel interna nune’e mós iha nivel externa. Governu mesak de’it la bele manán pandemia ne’e.

“Tanba ne’e ha’u apela ba renovasaun esforsu no ba mobolizasaun iha ita nia nasaun hodi hasoru inimigu ne’ebé tama iha ita nia territóriu be fó ameasa ba ita nia oan sira no ema sira ne’ebé ita hadomi nia vida,” Nia Hakotu.

No More Posts Available.

No more pages to load.