Rezultadu Final Apuramentu iha STAE, Horta 62,09% – Lú Olo 37,91%

by -637 views
Kandidatu Prezidente republika, ho numeru sorteiu 1, Jose Manuel Ramos Horta, Imajen pajina FB Ramos Horta

(Reportajen Mateus da cruz)

Dili (Timor Post)—Hafoin durante loron 2 prosesu apuramentu munisipál ne’ebé hala’o hosi STAE ba Sentru votasaun 1200 iha timor laran, rezultadu hatudu katak kandidatu ho númeru sorteiu 1, Jose Ramos Horta manan maioria hasoru nia rival kandidatu Francisco Guterres Lú Olo ho númeru sorteiu 2.

Rezultadu final apuramentu hosi STAE remata iha tuku 15:45 Oras Timor Leste, tuir rezultadu ne’ebé Timor Post asesu liu hosi Ajensia Lusa haktuir, kandidatu prezidente repúblika ho númeru sorteiu 1, José Ramos Horta hetan votu 397.145 (62,09%) enkuantu kandidatu ho númeru sorteiu 2, Francisco Guterres Lú Olo hetan votu 242.440 (37,91%).

Votu ne’ebé kandidatu na’in rua hetan mai hosi total 639.585 eleitór. Total eleitor rejistadu iha segunda volta hamutuk 859.692 hosi númeru abstensaun iha segundu volta hamutuk 28,83% enkuantu iha primeiru volta 24,72 %.

Hosi rezultadu apuramentu ne’e hatudu katak kandidatu Lú-Olo manan de’it iha munisípiu rua Baukau no Vikeke, no lakon iha Munisipiu Lautem nebe sai knuuk fretilín nian durante ne’e, enkuantu kandidatu ho númeru sorteiu 1, Jose Ramos Horta manan iha munisipiu 10 hanesan Aileu, Ainaru, Covalima, Dili, Bobonaro, Likisa, Ermera, RAEOA, Manufahi no Manatuto. (Lee Notisia Seluk iha Jornal Timor post/Asesu You Tube Timor Post)

No More Posts Available.

No more pages to load.