Reuniaun Konsellu Seguransa, Seidauk Iha Rezultadu Ba Karta Reforma Lere

by -2.010 views
Reuniaun Konsellu Superior Defeza no Seguransa, ne'e lidera husi Xefe Estadu, Francisco Guterres Lú Olo, Palásiu Prezidente Aitarak-Laran, kinta (27/01). (Foto/ Espesial)

(Reportajen Jaime Pires/Editora Suzana Cardoso)

DILI (Timor Post) – Xefe Kasa Militár, Koronél António Soares Da Silva ‘Maukalu’ hateten, reuniaun konsellu superior defeza no seguransa, ba karta reforma kona-ba, Xefe Estadu Maior FALINTIL-Forsa Defeza Timor-Leste (F-FDTL), Tenente Jenerál Lere Anan Timur nian seidauk iha desizaun.

“Reuniaun ohin ko’alia kona-ba nomeiasaun ezonerasun ba Tenente Jenerál F-FDTL, Lere  Anan Timur ka kona-ba xefia militár sira nian,” esplika Xefe Kasa Militár, Koronél António Soares Da Silva ‘Maukalu’ ba Jornalista sira hafoin remata reuniaun Konsellu superior Defeza no Seguransa iha Palásiu Prezidente Repúblika Aitarak-Laran, Kinta (27/01/2022).

Lee Notisia Relevante: Tenente Jenerál Lere Halai Sai Husi Reuniaun Konsellu Seguransa

Hatán kona-ba Tenente Jenerál Lere ohin fila uluk katak Koronél Maukalu, regra mak regula. Tanba asuntu ne’e ko’alia kona-ba nia karta reforma, entaun Tenente Jenerál Lere tenke hela iha li’ur.

“Ne’ebé ohin aprezentasaun husi Tenente Jenerál Lere nian depois nia fila tiha. Hela Membru konsellu hotu-hotu fó hanoin. No membru sira nia hanoin ne’e sei iha Prezidente Repúblika, hanesan mós Xefe Estadu. Maibé desizaun kona-ba ida ne’e seidauk iha,”  Koronél Maukalu dehan.

Hatutan Koronél Maukalu, Prezidente Repúblika husu hotu tiha membru konsellu sira nia hanoin tenke hela ba iha Prezidente Repúblika depois nia bá estuda no analiza depois mak nia foin fó sai.

“Ne’ebé reuniaun ida ohin ne’e di’ak no pozitivu. Maibé ita hein desizaun saida mak Prezidente Repúblika foti. Nia fó sai ne’e depende ba nia fó sai rezultadu. Tanba iha lei balun fó dalan atu fó sai rezultadu iha fulan ida nia laran ou fulan rua nia laran”, deklara Koronél Maukalu.(Lee Notísia Seluk Iha Jornál Timor Post/Asesu You Tube Timor Post)

No More Posts Available.

No more pages to load.