Reuniaun ho Lú Olo Kona-ba Markasaun Data Eleisaun Prezidensiál, CNRT Defende Salva Órden Konstituisaun

by -2.108 views
Foto Espesial

Dili (Timor Post)—Partidu CNRT lideradu Kayrala Xanana Gusmão kumpri konvite Prezidente Repúblika Francisco Guterres Lú Olo partisipa reuniaun iha Palásiu Prezidensiál, kona-ba markasaun data eleisaun prezidensiál ba periodu 2022-2027.

Hafoin reuniaun, Vise Prezidente CNRT Tomas Cabral ba Jornalista sira subliña, CNRT hanesan aset polítika estadu nian kumpri desizaun tuir órden konstituisaun.

“Ami hatoo ba prezidente pozisaun CNRT mak ida de’it, marka loron eleisoens,” Tomas Cabral haktuir ba Jornalista sira hafoin reuniaun ho Xefe Estadu, Sesta (07/01/2022).

Tomas dehan, CNRT kumpri desizaun ne’ebé iha nu’udar kontribuisaun partidu polítiku nian ba prosesu demokratizasaun iha Timor Leste.

Iha oportunidade Tomas dehan, CNRT maduru iha polítika. Tanba ne’e, nia afirma, tensaun polítika bele akontese maibé importante liu maka garante paz no estabilidade.

Kona-ba kandidatura CNRT nian ba Prezidente Repúblika periodu 2022-2027, Tomas hatete, CNRT sei foti desizaun iha konferénsia nasionál.

“CNRT iha nia estatutu rasik, konferénsia ou kongresu maka altu nivel partidu nian, desizaun partidu,” Tomas subliña.

“Ami prontu atu kompete no prontu atu salva órden konstituisaun,” Tomas afirma.

Liga ho diskusaun sira kona-ba atake variante foun COVID-19, Tomas dehan, sira labele ko’alia kona-ba kestaun ne’e tanba parte saúde maka hatene liu.

Prezidente Repúblika, iha loron 6 janeiru, hala’o ona enkontru ho Partido Democrático (PD), Partido da Libertação Popular (PLP), Frente Mudança (FM), Frente Revolucionária de Timor-Leste Independente (FRETILIN).  no iha loron 7 janeiru, hala’o reuniaun ho Partidu Unidade Dezenvolvimentu Demokrátiku (PUDD), Congresso Nacional para a Reconstrução de Timor-Leste (CNRT), Kmanek Haburas Unidade Nasional Timoroan (KHUNTO) no União Democrática Timorense (UDT).

Molok halo enkontru ho líderes partidus polítikus sira-nian, Prezidente Repúblika rona tiha ona Governu, liuhusi Primeiru-Ministru, Jeneral Taur Matan Ruak no Ministru Administrasaun Estatal Miguel Carvalho.

Prezidente Repúblika rona mós Comissão Nacional de Eleições (CNE) no Secretariado Técnico de Administração Eleitoral (STAE) kona-ba preparativus ba eleisaun prezidensiál 2022.

Ba eleisaun prezidensiál tinan ne’e, númeru sentru votasaun no estasaun votu sei aumenta iha territóriu Timor-Leste tomak. Ba eleisaun antesipada 2018, iha sentru votasaun 885. Ba eleisaun prezidensiál 2022, sentru votasaun sei aumenta ba 1200. Númeru estasaun votu sei aumenta husi 1260 (iha 2018) ba 1500, iha tinan 2022.

Hasa’e númeru sentru votasaun no estasaun votu permite hakbesik liután fatin votasaun ba eleitór sira no nune’e, maioria ho otas 17 ka liu, ne’ebé rejista iha STAE, bele ezerse sira-nia direitu atu hili Prezidente Repúblika ba mandatu 2022-2027. Nune’e, taxa partisipasaun eleitór sei sa’e iha eleisaun tuir mai.

Ho númeru sentru no estasaun barak liu, númeru votante iha fatin ida-idak sei menus. Tanba buka hamenus númeru eleitór halibur iha fatin ida, Governu Timor-Leste foti medida di’ak ida atu proteje mós ita nia ema husi vírus moras Covid-19 nian, ne’ebé sei la’o nafatin iha mundu, ho variante oioin. (cao)

No More Posts Available.

No more pages to load.