Responsabilidade Médiku, Stigma no Diskriminasaun ba Ema ho HIV-SIDA

by -296 views
Foto Espesial

Jornalista Estajiáriu Cardenio Alves / Editór Noémio Falcão

Dili (Timor Post)— HIV-SIDA nu’udar moras daet husi ema ba ema liuhusi relasaun seksual livre. Moras ne’e sai preokupasaun mundu nian. Iha Timor – Leste, governu hahú deteta no fó atensaun liuliu halo kampaña nia ba prevensaun.

Dala ruma feto ka mane ne’ebé hetan ona virus HIV-SIDA no ema seluk hatene, mosu stigma no diskriminasaun.

Maske nune’e, médiku ka pesoal saúde sira sai nu’udar ema ne’ebé atende ema ho moras daet ne’e ho responsabilidade tomak ho prinsípiu umanu no tau matan ba pasiente sira ho dignu.

“Karik ita la’o tuir ho pesoal saúde sira nia maneira ho dignu, ita sei hadok-an husi moras HIV-SIDA no pesoal saúde sira presija hanoin katak, pasiente mak sai hanesan pesoal saúde nia maior preokupasaun,” Diretora Kontrolu Moras-Ministériu Saúde, Josefina Clarina João, iha Semináriu Internasionál ne’ebé hala’o iha Otél Novo Turismo, Dili, Tersa (14/12/2021).

Josefina subliña, nia parte iha estratejia foun kona-ba hapara stigma no diskriminasaun ba ema ho HIV-SIDA no moras daet sira seluk, ne’ebé Ministériu Saúde servisu hamutuk ho organizasaun mundiál saúde (WHO sigla Inglés).

Josefina kondena, médiku ka pessoal saúde balu bele halo stigma no diskriminasaun ba ema ho HIV-SIDA bainhira laiha konfidensialidade hafoin halo ezaminasaun ba kondisaun pasiente sira nian.

Entretantu Reprezentante WHO iha Timor Leste, Arvind Mathu via Zoom, subliña, ema hotu presiza iha konsiénsia ba moras daet HIV-SIDA.

Nia hatete, tenke iha solidariedade ba malu vítima sira moras HIV-SIDA. Globalmente moras daet ne’e sai problema boot maske esforsu hotu hala’o hodi kompate hahú kedas iha tinan 1999.

Iha Timor Leste, Arvid hatete, iha tinan 1999 mai leten númeru HIV-SIDA sa’e ba bebeik hahú husi pursentu 0.2. Husi tinan ba tinan sa’e inklui vítima sira mai husi seksu trans jender ka mane ho mane lori númeru sa’e ba pursentu 1.2 husi populasaun ein jerál.

No More Posts Available.

No more pages to load.