Reposta ba deklarasaun Teofilho Caldas konabá UMA KULTURAL LAÚTEM NE’EBÉ LAIHA VALOR KULTURAL

by -4.807 views
Novis Risa Moto

Husi : Novis RisaMoto

  1. Introdusaun

Iha Artigu ne’e hau hakarak resposta ba Sekretariu Estadu Arte no Kultura (SEAK) relasiona ho nia Deklarasaun iha Loron 9 de Fevereiru de 2022 ne’ebé  fosai iha media RTTL no Jornal hateten katak, UMA TRADISIONAL IHA LOSPALOS LAIHA VALOR KULTURAL” deklarasaun ne’e hatudu katak minimiza ona Costumes tradisionais hanesan instrument ida ne’ebe bisavo sira uza to’o agora, no prosesu arkitektura ba uma tradisionál no valór kulturál sira hanesan valor sosio-ekonómiku sira.

Liu husi artigu ne’e hau mós nudar Laútem oan ne’ebe sente triste tamba rona Sr. Teofilo Caldas nia deklarasaun hateten katak uma kultural LEE ZIAVAL laiha VALOR KULTURAL hanesan Laútem oan husu ba Sr. Teofilo Caldas nia esplisaun konabá definisaun Valor nemak saida.???

Segundu, Uma-Kulturál husi Munisípiu Lautém konsidera nudar mós simbolu indentidade Timor-Leste, iha nivel nasionál no Mundu Internasionál. Uma-traditional nasionál ne’e simbolu unidade no fraternidade ba Povu Timor Leste embora nudar Lautem nia identidade kultural, nune’e mós konsidera hanesan Centru kultural hodi demonstra no sai Prezervasaun no dezenvolve sai icon turizmu kulturál iha Timor Leste.

Infelizmente, kondisaun simbolu unidade ne’e rasik ho kondisaun Grave no labele repara no monu tanba hari’i tinan barak ona no laiha manutensaun desde hari’i. Sistuasaun ida ne’e insisti Kominidade Laútem oan tur hamutuk hari komisaun no iha tinan 2020 Trabailhador Laútem oan ne’ebé hela iha Inglatera hodi koileta Fundus.

Ístoria ka Etimologia Munisipiu Laútem

Naran munisipiu Lautem mai husi lian Fataluku “Lau-Teinu” signifika Tais-Lulik (Tetun). Iha Munisipiu Lautem forma husi lian tolu ne’ebé to’o agora sei eziste ne’e maka Fataluku, Makasaé, Makalero no Sa’ani nune’e mós ho nian ramifikasaun sira seluk tán. Iha Timor-Leste iha lian lima ne’ebé konsidera nudar lian Non-Austronesian ka lian Papua nian, ne’e maka hanesan Fataluku, Makasa’e, Makalero, Mambae no Bunak. Haree tuir arkitetura tradisionál iha Munisipiu Lautem hatudu katak orijen uma tradisionál iha Munisipiu Lautem mós iha relasaun ho lian Papua, ne’ebé tama iha Lautem iha tempu bei ala sira nian, hanesan mós relata ona iha livru “Arquitetura Timorenese” ne’ebé hakerek husi autor Portugues Rui Cinatti. Haktuir nia katak simbolu “Lakulili” (lian Fataluku) sira ne’ebé eziste iha parede uma tradisionál Lautem (Lee Jiaval) nian identiku ho simbolu sira ne’ebé eziste iha uma tradisionál husi nasaun Fiji. Haree husi angulu istória sosiedade feudal Munisipiu Lautem nian relasiona ho lian papua ne’ebé ohin loron eziste. Munisipiu Lautem mai ho nian ninia istória lian no kultura ne’ebé komplexu liu kompara ho sira seluk iha Timor-Leste, haktuir rezultadu peskiza barak husi liur ba Timor.

Aspeitu Unidade

Uma Tradisionál Munisipiu Lautem reprejenta mós simbolu Unidade Kultural ida ne’ebe halibur sosiedade grupu lubuk bo’ot, hodi tane malu no tulun malu iha nia prosesu konstrusaun to’o remata. iha prosesu ne’e hamosu mós tradisaun tane malu (nita Somsomone iha lian fataluku) no tradisaun hakbit malu/halibur sasan hodi tulun malu (horu horun iha lian fataluku).

Alen de ne’e iha nia prosesu harii Uma Tradisionl ne’e hahoris valor lubuk ida, hanesan Valor Sosial ne’ebe kesimetin relasaun sosial entre Lautem oan sira no mós valor ekonomiku hodi halibur sasaun atu tulun malu nu’udar Umane, Feto Sá no maun alin. tanba ne’e iha Lautem laran laiha ema Seluk no Let maibe mesak Maun Ailin, Inan Feton Tiu no Tia iha relasaun Kultural.

Uma Lulik mós sai fati no sentru atu halibur malu hodi fahe mós tarefa(Serbisu) no responsabilidade ba malu nu’udar membru familia ne’ebe iha ligasaun ho Relasaun Feto Sa, Umane no Mau alin atu halibur malu no serbisu hamutuk, hahú husi prosesu konstrusaun to’o iha ninia selebrasaun ba seremonia Inagurasaun Uma Tradisionál ne’e.

Alen de valor sosial ne’e Uma Tradisionál ne’e mós kesi metin valor ekonomia komunitariu ne’ebe ho karakter ko’opetrativu, hodi halibur malu no halibur mós materiál sira (Fasilidade Konstrusaun), Animal no sasan seluk ne’ebe presija iha prosesu konstrusaun to’o iha inagurasaun ba Uma Tradisionál ne’e.

Produtu hirak ne’e sei halibur ho karakter kreditu (acaleu iha lian fataluku) tantu serbisu fijiku no materiál ne’ebe halibur nu’udar tusan ida. Han Isin sikat Ruin, hodi kesi relasaun Sosial no Ekonomiku hodi bele tulun malu fila fali iha tempu seluk wainhira presija malu.

Aspeitu Turizmu

Timor-Leste depois determinia nina idenpendénsia, presiza iha planu estratéjia ba dezenvolvimentu iha multisetorál. Setor importante ida mak mak hanesan turizmu kulturál. Mehi atu realiza setór ne’e ho di’ak maka presiza konseva no halo prezervasaun ba kultura Timor-Leste fokus liubá kultura uma lisan tradisionál. Iha Timor-Leste iha lisan oioin ho nian uma lisan tadisionál ketak-ketak. Iha oportunidade ne’e ita fokus ba uma lisan tradisionál Lautem ho naran famozu “Lee-Jiavál”. To’o ona tempu atu komesa hanoin konstrutivu oinsá planu estratéjiku atu harii filafali ka halo rekonstrusaun uma lisan tradisionál Lautem hodi sai sentru kulturál iha Munisipiu Lautem. Nune’e bele sai riku soin fíziku atu bele atrai turista sira iha futuru mai nu’udár parte rekursu lokál ne’ebé kategoria renovavel. Tanba ita labele dependénsia ba rekursu natural sira ne’ebé non renovavel hanesan ita nian riku soin mina ne’ebé bele to’o tempu balu oin mai bele mara. Tanba ne’e nu’udar Lautem oan no joven jerasaun foun komesa hanoin oinsá iha estratéjia atu dele dezenvolve retór turizmu ne’ebé fokus liubá riku soin kultura tradisionál sira hanesan uma tradisional Lautem no asessóriu lokál sira.

Sentidu De Pertensia

Konséitu Sentidu Pertensia (sense of belonging) iha ámbitu rekonstrusaun Uma Tradisionál Lautem. Munisípiu Lautem kompostu husi Postu Administrativu 5 ne’ebé tradisionalmente eziste ho idaidak nian valores tradisaun ne’ebé mak diferente. Ho konsiderasaun katak uma tradisaun ne’e alende konsideradu nu’udar simbolu kurturais ne’ebé presiza prezerva, uma tradisionais ne’e mós sai ona simbolu tradisionais ne’ebé  reprezenta Timor Leste iha nivel interasionál. Tanba ne’e, iha ámbitu konstrusaun Uma Tradisionál ne’e presiza involvimentu ativu parte hotu hotu Lautem oan, ne’ebé la haree bá suku, ras no relijiaun, no polítiku, hahú kedas husi faze planeamentu to implementasaun programa.

Realidade hatudu katak aspeitu unidade sai ona forma ida husi prátika hodi haforsa reziliensia sosiedade hodi enfrenta situasaun sira ne’ebé bele sai amesa bá ezisténsia valór kurturais, liuliu iha kontéxtu mundu ida globilizadu ohin loron ne’e.  Sosiedade bele sai frazíl no laiha reziliensia wainhira unidade no sentidu partensia la konsege materializa iha konséitu planeamentu no implementasaun dezenvolvimentu ruma.

Baze bá pensamentu ida ne’e, envolvimentu parte hotu hotu iha prosesu konstrusaun uma kultura ne’e nu’udar aprosimasaun ida atu oinsá bele hametin no asegura unidade no sentidu pretense (sense of belonging) nu’udar Lautem oan, bá iha kualker aspeitu ligadu ho interese Munisípiu Laútem nian, partikularmente bá rekonstrusaun uma tradisionál Munisípiu Laútem. Iha prosesu rekonstrusaun uma tradisionál ida ne’e ezije tebes atu iha partisipasaun planu, envolvimentu ativu no iha kontribuisaun direta no indireta (fizik no non fizik) Laútem oan sira hotu, hodi nune bele provoka sentidu pertensia ida ne’ebé forte, únidu, sustentavel no orientadu bá interese no prospriedade povu tomak nian.

  1. Tipu Arkiteteura Tradisionál iha Municipio Lautem

Iha Munisipiu Lautem iha uma tradisionál tolu ne’ebé eziste, ida maka “Lee Jiaval” husi Fataluku no “Omara” husi Makasaé no Makalero. Ohin loron “Lee Jiaval” sai ona simbolu Kultural Nasional ne’ebé reprezenta Timor-Leste iha mundu.  Tipu “Lee Jiaval” iha oin tolu, ida maka “Sei-Metchen”, ida seluk “Topo-Soru”no ida seluk fali “Fata-Sirik”. Tipu “Lee Jiaval” ne’ebé eziste iha Lautem, mai ho ida-idak nia karákterista arkitetrual rasik. Ohin loron tipu “Lee Jiaval” Sei-Metchen iha signifikasaun reprezentativu tebes tanba alem de mai ho ninia estrutura tékniku ne’ebé komplexu liu, artetikamente furak nune’e mós ho ninian valór kulturál sira ne’ebé importante tebes iha sosiedade Lautem. Uma “Lee Jiaval” ne’ebe agora daudaun existe iha Sentru Kultural Lospalos maka tipu “Topo-Soru”

  1. Materiál Konstrusaun

Materiál konstrusaun ne’ebé uza hodi konstrui Uma Tradisionál (Lee Jiaval) sai hanesan fatór determinante ida atu define autentisidade uma tradisionál. Husi tempu uluk kedas, uma tradisionál ne’ebé eziste iha Lautem mai ho ninia komplexidade ho métodu konstrusaun no laiha materiál ne’ebé mosu husi rezultadu insdutrializasaun.  Enjerál estrutura uma tradisionál  fahe ba parte neen, ne’ebé forma husi Ai-rin haat ho materiál lokál husi “ai-besi”, vigamento (kerangka) ho materiál ai-na no ai-besi, Cobertura (kuda-kuda – melayu.) ho materiál ai-akadirun, parede (kotcho faat.) ho materiál au-maus no ai-na, pavimento (ca’at faat.) ho materiál ai-na no ikus liu maka Uma-kakuluk ho materiál ai-car no ai-naululir (Fia faat).

  1. Istória Koloniál no Invasaun

Uma tadisional ne’ebé ohin loron sei eziste ne’e rezultadu konstrusaun husi governu Indonézia nian. Tuir konstrusaun husi tempu indonézia hamosu uma tradisionál rua ne’ebé husi tempu uluk beila sira nian eziste ona, sira ne’e maka Uma tradisionál (Lee Jiaval) no Varatcha. Reflete ba hisotria kolonial no ivazaun nian, ita nota katak autor Portugues sira halo ona peskiza lubuk ida kona-ba uma tradisionál iha Timor-Leste tomak inklui Uma Tradisionál (Lee Jiaval). Haktuir ema Portugues sira katak Uma Tradisionál (Lee Jiaval) husi Munisipiu Lautem estetikamente mai ho ninia ornamentu no artezenatu sira ne’ebé elegante liu iha Timor-Leste. Alem de haree husi tempu koloniál ita mós nota husi tempu invazaun Indonézia nian katak, husi tinan por volta de 1990 governu Indonéziu harii Uma Tradisionál (Lee Jiaval) ho tipu “sei-metchen” no “Varatcha” iha sentru Lospalos ho objetivu fó “Rekonesimentu ba kultura Timorense”. Ohin loron, uma tradisionál rua ne’e hetan estragu tanba laiha sistema manutensaun rotina hodi bele asegura uma tradisionál ne’ebé rezide iha sentru Lospalos.  Objektivu prinsipál ida husi elaborasaun ba istória uma tradisionál ida ne’e mak atu hatene tuir istória no oinsá maka ita atu rekonstrua Uma Tradisionál (Lee jiaval) hodi nune’e bele preserva valor kultural sira no arquitetura tradisionál Lautem ne’ebé sai mós hanesan simbolu kultural nasional no patrimoniu estadu.

  1. Aspeitu Valór no simbolu Kulturál

Kultura sai hanesan instrument ida ne’ebe komunidade uza hodi respeita malu tuir costume tradisaun lautem nian, valor kultural mós principal liu ba lautem oan sira. Costumes tradisionais mós sai hanesan instrument ida ne’ebe bisavo sira uza to’o agora.

Kultural lautem sei lasu metin identidade timor nian bele respeita malu husi gerasaun ba jerasaun  to’o agora,  liu husi jerasaun patrilinear/matrilinear mós hamosu liafuan damen domin no paz iha komunidade nia le’et. Ho ida ne’e mak halo jerasaun ba jerasaun tane malu nafatin, rekonnese nafatin ninia jerasaun.

Liu husi costumes tradisionais sira ne’e mak halo lautem oan sira sei valorize nafatin heransa beiala sira nia to’o ohin loron mak, surik, samurai, morte’en, tais timor, kilat-lulik, no selseluk tan.

Iha Konstituisaun RDTL artigo 59 mós sei fó dalan ba kultura timor atu nune’e jerasaun foun bele rekonese no fó valoriza nafatin liman rohan ka heransa beiala sira nian. Estadu mós sei konsidera no valoriza nafatin nudar patrimoniu estadu nian.

Konstituisaun RDTL fó dalan nafatin ba sidadaun timor-leste katak sidadaun ida nebe mak iha kbiit atu harii ka rekonstrusaun uma tradisionál ida lei inan sei fó dalan sidadaun ne’e, tanba estadu sei rekonhese katak uma-lisan ne’e mós sai reprejenta simbolus nasional no internasional iha mundu.

Iha municipio lautem, kada uma-lisan iha ninia simbolu rasik wainhira sira harii uma-lisan ida obrigatoria sira tenke tau rasik sira nia simbolu mak hanesan: uma-lisan husi chailoru sira nia simbolu mak lafaek, no fitun-boot (No-Ipi) lia fuan seluk mak ipinaka-lafai”, uma lisan husi wachu-mura sira nia simbolu mak loron-matan “wachu-muda” no sel-seluk tan.

Simbolu kultural mós moris nanis kedas iha era monarkia bisavo sira nian, ohin loron jerasaun foun sei rekonese nafatin no konsideda mós sai hanesan simbolu tradisionál timor nian.

  1. Rejultadu Peskiza

Uma lulik hotu-hotu ne’ebe existe iha ita nia rain Timor-Leste ne’e tama iha kategoria “Arkitetura Vernakular”, nune’e la seluk la leet, uma lulik “Lee Jiaval” mós tama iha kategoria “Akitetura Vernakular” ida ne’e.  Akitetura Vernakular signifika tipu arkitetu ida ne’e sempre reprezenta povu ida husi fatin ka rejiaun ida nian, ne’ebe mai ho ninia metodu kostrusaun rasik, material konstrusaun ne’ebé edemiku ba fatin ka lokalizasaun geografika ida nian no reflete tradisaun lokal no pratikas kulturais. ne’ebe mós esplika katak hanesan aktividade kontunidade ida husi povu ne’ebe ho heransa hanesanUma “Lee jiaval” hanesan mos ho “Akitetura Vernakular” sira seluk ne’ebe existe iha Timor-Leste, ne’ebe konsideradu hanesan espresaun kultural povu indigena ida, bei-ala sira, grupo etnicidade ida nian.

Konkluzaun

Tamba ne’e ami husu ba Sr. Teofilho Caldas atu hatene no rona saida mak hau hakerek iha leten tamba saida valor kultural Lautem oan nia sei metin to agora, kulturalmente munisipiu Laútem Diferente boot tebes ho minisipiu sira seluk.

Iha era Digitalizasaun ke Estadu investe ba buat boot maibe valor kultural hanesan eransa ida nebeke ami sei lahusik. Baze bá pensamentu ida ne’e, envolvimentu parte hotu hotu iha prosesu konstrusaun uma kultura ne’e nu’udar aprosimasaun ida atu oinsá bele hametin no asegura unidade no sentidu pretense (sense of belonging) nu’udar Lautem oan, bá iha kualker aspeitu ligadu ho interese Munisípiu Lautem nian, partikularmente bá rekonstrusaun uma tradisionál Munisípiu Lautem. Iha prosesu rekonstrusaun uma tradisionál ida ne’e ezije tebes atu iha partisipasaun no halo planu, envolvimentu ativu no iha kontribuisaun direta no indireta (fizik no non fizik) Laútem oan sira hotu, hodi nune bele provoka sentidu pertensia ida ne’ebé forte, únidu, sustentavel no orientadu bá interese no prospriedade povu tomak nian.(***)

No More Posts Available.

No more pages to load.