(Reflexaun badak ba Domingo XVII tempo komun. 1Rs. 3, 5. 7-12; Sal. 118; Rm. 8, 28-30; Mt. 13, 44-52)
Hosi: Luis Pereira S,J
Kontexto!
Hanesan Semana kotuk, semana ida ne’e, liturjia kontinua aprezenta mai ita konaba tema bót: Reino Lalehan. Jesus sempre uza aiknanoik/dadolin atu explika konaba Reino Lalehan/Reino Maromak nian. Saun Mateus ne’ebe ita rona fila-fila iha Ano A ne’e, haktuir konaba Jesus uza dadolin/aiknanoik hanesan: fini diak, mostarda musan, fermento, osan mean, dai bot no fatuk murak atu tulun ema kumprende saida mak Reino Lalehan/ Reino Maromak ne’e.
Liturjia domingo XVII nian, especifikamente aprezenta aiknanoik Reino Lalehan hanesan Osan Mean, fatuk murak no dai bot ne’ebe ema subar iha to’os no ema halo buat hotu, fa’an riku soin hotu atu bele sosa rai ne’e hodi hetan riku soin refere no hanesan dai ne’ebe kaer buat hot-hotu. Hafoin, mai iha tais ninin, mak ema sei husi sai buat ne’ebe diak no buat ne’ebe at.
Ponto 3 ita bele reflete!
- Neon naroman!
Leitura dahuluk husi livro liurai sira nian, haktuir konaba Salomão ne’ebe husu grasa neon naroman ba Maromak iha ninia ukun atu nia hatene hare, decide saida mak los no diak ba nia no ba ninia povo ne’ebe nia ukun. Hanesan ukun nain, nia la husu riku soin, saude diak nst, maibe, nia husu deit neon naroman atu nia halo decizaun ne’ebe los no diak ba ema barak nia moris. Nune, sabedoria ne’ebe nia husu, Nai Maromak haraik ba nia.
Ita preciza husu grasa ne’ebe hanesan katak grasa neon naroman nian, atu ita hatene tetu buat hotu iha ita nia moris ne’e, hare ida ne’ebe mak diak, husi ida ne’ebe mak at. Hare ida ne’ebe mak los, husi ida ne’ebe mak la los. Hare ida ne’ebe mak diak ba an deit, husi ida ne’ebe mak diak ba ema hotu nian. So ho grasa neon naroman deit, ou sabedoria ne’e, mak ita bele halo ita nia moris ne’e nudar sarani diak no los. Ita hatene halo saida mak Nai Maromak husu ita atu halo iha moris ne’e.
- Tuir Naroman bot!
Leitura daruak husi Saun Paulo nia karta ba sarani sira iha Roma haktuir konaba Maromak hadomi tebes ita ema no nia fihir ona ema sira ne’ebe halo tuir nia hakarak. Ema sira ne’e, preciza lao tuir maun bot: Jesus Kristo. Nia mak Naroman Bot ne’ebe ema tenki lao tuir tamba Nia mak Dalan, Lia-Los no Moris. Laiha dalan diak liu, atu hatene domin Maromak nian ba ita ema, se laos Maun Bot ne’e.
Laiha dalan los liu, atu hatene konaba Reino lalehan, se laos Maun bot ne’e. Nia mak unika pessoa ne’ebe, ho nia, iha nia, ita hare, hatene no hadomi Maromak. Iha nia no ho nia, ita iha neon naroman naton atu sai ema diak no los, liu husi ita nia decizaun sira moris nian. Tamba ne’e, mak ita lao tuir nia nudar Naroman bot ida.
- Jesus mak Osan mean no fatuk murak!
Leitura datuluk husi Evanjelista Mateus haktuir konaba Reino Lalehan hanesan osan mean no fatuk murak ne’ebe ema fa’an buat hotu-hotu atu bele hetan no hetan ona, ema sei haksolok. Saida los mak osan mean no fatuk murak ne’e? Nia mak Jesus-Kristo. Nia mak ema buka iha moris ne’e. wainhira hetan ona nia, ema sei hakmatek no haksolok. Tamba ne’e, diak atu ita tau Reino Lalehan nudar ita nia prioridade moris nian. Ita buka nia iha ita nia moris ne’e.
So nune deit mak ita nia moris iha ninia sentido no sentido moris iha duni ba ita. No ita bele lao tuir knar ne’ebe ita simu ona iha batismo atu sai profeta, liurai no nai lulik. Tamba ne’e, ita husu grasa neon naroman no hamrok atu hetan Osan Mean no Fatuk Murak ne’ebe bele marka diferensa ba ita nia moris. So nune deit mak ita bele hananu ho salmista: “Nai, ha’u hadomi tebes ita nia ukun”. Amen!(lupersj)
(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)
975 total views, 3 views today
Bele hare Video Seluk :
Subscribe to Timorpost
