ADVERTISEMENT

Husi Oan Deit Mak Bele Ba Aman, Laiha Dalan ‘Korta’ “Ha’u mak dalan, Lia-Lós no Moris Hun”

Timor Post - Relijiaun
  • Share

(Reflexaun domingo V tempo Paskoa nian. At. 6, 1-7; Sal. 33; 1Ped. 2, 4-9; Jo. 14, 1-12)

Husi: Luis Pereira SJ

ADVERTISEMENT
SCROLL FILA BA NOTISIA


Kontexto!

Ita hakat tama ona ba domingo V tempo Paskoa nian. Iha semana kotuk, litujia aprezenta mai ita Jesus núdar Bibi-Atan Diak. Bbi-Atan Diak tamba Nia kuidadu no tau matan ba bibi sira ho diak. Nia lori sira ba we  naresin no dút matak. Nia mak lutu-matan. Bibi sira laiha dalan seluk atu tama no sai, se la liu husi Nia. Ohin, liturjia aparezenta mai ita Jesus núdar Dalan, Lia-Lós, no Moris Hun.

Ponto 3 ita bele reflete hamutuk:

  1. Neon keta susar!

Molok husik mundo ne’e, Jesus hatene ona dezafiu, susar no terus ne’ebé nia discipulo sira hasoru no sei hasoru iha futuro. Nia hatene sira nia susar wainira Nia la hamutuk ona ho sira. Tamba ne’e, Nia asegura sira hodi dehan: “Imi neon keta susar. Imi fiar Maromak, sei fiar mós Ha’u”. Seguransa ne’ebé Jesus fo ba nia discipulo sira ne’e, hatudu katak discipulo sira sei la mesak. Nia sei hamutuk ho sira. Nia Espirito sei hamaluk sira iha sira nia knár haklaken nian. Leitura dahuluk husi Apostolo sira nia hahalok fo sasin konaba ba ida ne’e.

Ita moris iha mundo ida ne’ebé oferese ba ita dezafiu oi-oin iha haklaken Naí Maromak nia Lia-Foun Diak. Nuné, Jesus mós dehan ba ita ida-idak: Neon keta susar. Fiar iha Maromak, fiar mós iha Ha’u. Ida ne’e mak ita nia seguransa no garantia husi Jesus. Nia ba prepara fatin ba Ita no sei mai fali atu lori ita ba fatin ne’e.

  1. Fiar no permanence/hela/horik ho Jesus!

Lia-fuan rua ne’ebé mosu fila-fila iha Evanjelho João nian ohin mak fiar no permanence/hela/horik. Jesus, fo hanoin nia discipulo sira no ita ida-idak ema sarani, atu fiar iha Nia, permanence/horik/hela iha Nia. Basá, Nia mak revelasaun ás liu husi Aman-Maromak Kriador. Iha nia mak ita bele haré Maromak ida ne’ebé ita labele hare ho matan. Nia ho Aman ida deít. Nuné, Fiar no hela iha Nia implika fiar no hela iha Aman Maromak. Tambá, Nia rasik dehan: Ha’u Aman hela ho Ha’u no Ha’u ho Nia”.

  1. Jesus mak Dalan, Lia-Lós no Moris Hun!

Jesus dehan ba Tomé: “Ha’u mak Dalan, Lia-Lós no Moris Hun”. Nia mak dalan uniku ba Aman Maromak. Hanesan ita hatene katak liu tiha Adaun no Eva lori ita monu ba salan, ita fahe malu ita ho Maromak. Nuné, ita buka dalan atu fila hikas ba Maromak Kriador. Tamba ne’e mak Nia haruka nia Oan Mane Mesak mai atu soi ita, atu lori ita fila hikas ba Nia. Nuné, Jesus mak lori ita ema sarani ba Aman Maromak Kriador. Ita so bele ba Aman, se ita liu husi Oan. Tamba ne’e, ita dehan, ita so bele asesu ba Lalehan, se ita hatene, konhese, hadomi no lao tuir Jesus. Simplesmente, fiar iha Nia no hela iha Nia mak bele lori ita ba fatin ne’ebé Nia prepara ona.

Jesus mak Lia-Lós no Moris Hun tamba  Nia mak Aman Nia Lia-Fuan ne’ebé mai liberta ema husi salan nia ukun ho nia moris rasik. Nia terus, mate no Moris Hias hatudu katak buat hotu ne’ebé nia halo mak halo deit Aman nia vontade Salvasaun. Ida ne’e Lia-Lós ida ne’ebé ita la bele nega. Iha nia, mak ita hetan moris lolós katak moris ho sentido no moris rohan laek. Nuné, mak ita dehan Nia Moris nia hun basá, moris mai husi Nia. Ho nia, ita la mate tan.

Ita habadak reflexaun ne’e, hodi dehan katak Jesus fo hanoin discipulo sira no ita ema sarani atu keta neon susar. Basá, Nia hamutuk ho ita. Ho Nia, ita bele ba Aman Maromak. Iha Nia, ita hetan Lia-Lós ida ne’ebé halo ita libre. Tan Nia, ita hetan moris no moris rohan laek. Ita laiha dalan ‘korta’ ba lalehan, se ita la liu husi Jesus. Nuné, mai ita haklean ita nia fiar iha Nia no hela ho Nia, atu ita hatene dalan, lia-los no moris.  So nuné deít mak ita bele hananu ho Salmista:  “Naí, ami hein ita nia laran luak”. Amen!(lupersj)

(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)

 1,092 total views,  9 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Husi Oan Deit Mak Bele Ba Aman, Laiha Dalan ‘Ko…” A few seconds ago
Lee Mós :
Distansia Maromak Ho Ema Sai Klót Ho Maria Nia ‘Sim’

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No