Eukaristia Bele Lori Ema Hetan Fali Nia Diresaun Moris Nian

“Hola tiha fatin iha mesa ho sira, Jesus kaer paun, fo tiha bensa, hafoin, silu fahe ba sira”

(Reflexaun ba domingo III tempo paskua nian. At. 2, 14. 22-23; Sal. 15; 1Ped. 1, 17-21; Lc. 24, 13-35)

SCROLL FILA BA NOTISIA

Hosi: Luis Pereira SJ

Kontexto!

Ita tama ona ba domingo III tempo paskua nian. Nuné, ita iha hela ambiente selebrasaun Kristo nia terus, mate no moris hias. Tamba ne’e, liturjia aprezenta mai ita experiensia discipulo sira nian, ne’ebé lakon diresaun, tauk, desanimo, frustrado liu tiha Jesus nia mate. Discipulo nain rua iha dalan ba Emaus hatudo experiensia ida nee’. Ho ida ne’e, Jesus moris hias mosu ba sira. Nia lao ho sira; nia konversa ho sira; nia explika ba sira hodi tulun sira kumprende misterio ninia mate nian no ikus mai sira hahu konhese nia, wainhira sira konvida nia, atu hela ho sira. Sira rekonhese nia iha ‘MESA HAN” kuando nia silu fahe paun no fahe ba sira. Iha ne’eba, sira hatene katak nia mak Kristo.

Ponto 3 ita bele reflete:

Konversa ho Jesus Moris Hias!

Iha ita nia moris, iha momento balun, ita sente kbit-laek, sente preokupado, sente tauk, sente desanimo, sente lakon diresaun moris no sente lakon esperansa hodi la rekonhese Naí Maromak. Discipulo nain rua iha dalan ba Emaus hatudu experiensia ida ne’e. Maibé, Jesus mosu ba sira, konversa ho sira no ida ne’e, tulun hodi halós sira nia duvidas no preokupasaun sira. Sira nia fuan sente manas fali.

Ita preciza konvida Jesus tama iha ita nia moris li-liu iha ita nia situasaun nakukun sira moris nian, konversa ba no ho nia, atu nuné, ita bele hetan fali diresaun moris nian. Nia bele tulun haforsa ita; nia bele halakon ita nia preokupasaun sira; nia bele halo ita sente ksolok fali; nia bele halós no halakon ita nia duvida sira. Tambá ne’e, konvida nia tama iha ita nia moris no konversa ho nia neneik no beibeik. Ha’u fiar katak ita mós, bele hetan experiensia hanesan ho discipulo sira.

Kompartilha: fahe ba malu!

Discípulo nain rua iha dalan ba Emaus, bele rekonhese Jesus wainhira nia kompartilha ho sira iha Mesa han nian. Iha Eukaristia, ita hakat husi meza/ambaun: Lia-Fuan nian ba meza/altar: paun no tua nian. Ita simu ‘aihan’ hanesan husi fatin rua. Aihan iha forma Lia-Fuan no Lia-Fuan ne’e rasik transforma ba aihan (Paun no tua). Tan ne’e, iha ambaun no altar, ita hotu sai ida deit: komunhaun-uniaun ho Naí Maromak. Nuné, Eukaristia mak Maromak nia horik fatin no sentro ita ema nian. Husi nebá, mak moris espírito partilha no copartilha (silu-fahe no fahe) no komunhaun nian: sai ida deít.

Ita simu Maromak nia Futar-Lia-Fuan no nia Isin no Ran, sira tenki ‘encarna’ iha ita nia-an. Atu husi ne’ebá, moris espírito ‘silu-fahe’ nian katak ita silu-fahe ita nia moris: matenek, talento, konhesimento, kreatividade, valores diak sira ba ita nia maun–alin sira liu husi lia-fuan no hahalok iha sasin lor-loron nian hanesan discípulo sira ne’ebé experiensia Jesus moris hias ba fahe fali ho sira seluk.

Fonte no sentro moris Kristaun nian

Eukaristia mak fonte no sentro ita nia moris kristaun nian. Jesus hasae nia isin no ran núdar karan atu soi ita ema. Portanto, iha Eukaristia ita alimenta ita isin no klamar ho Jesus nia Futar-Isin no Ran, ita mós proklama katak ita fiar iha prezensa real Jesus Kristo nian iha don sira Eukaristia nian.

Iha Eukaristia, ita hatudu fiar ba Maromak hodi agradese ba Maromak Oan ne’e mai fo nia moris rasik atu soy ita husi mate rohan-laek. Ho Nia, Maromak nia Lia-Fuan enkarnada, ita bele goza grasa sira lalehan nian. Iha Nia, ita hetan salvasaun. Tan Nia, ita hetan kura tamba Nia mak mediko divino. Hodi Nia, ita sai ida deit ho Maromak: komunhaun no uniaun ho Maromak no maun-alin sira: moris no mate. Nuné, ita nia fiar expresa iha ema: pessoa Jesus-Kristo nian. Ida ne’e mak ita rona iha leitura sira.

Jesus-Kristo mak Lia-Fuan Aman Maromak nian. Nia mak ita nia senha/sandi/pasword atu hetan asesu ba Aman Maromak/Lalehan. Iha Nia no ho Nia mak ita bele hetan sentido lolós husi ita nia gratidaun, preokupasaun, duvidas, no tauk sira. Nuné, ita tenki habelun-an ho Eukaristia. Basá, Eukaristia bele lori ema hetan fali diresaun moris nian. So nnuné deit, mak ita bele hananu ho salmista: “Naí hatudu mai ami dalan maksoin”. Amen! (lupersj)

975 total views, 3 views today

Oinsa Ita nia Reaksaun iha Notisia Nee?