ADVERTISEMENT

We Matan Siloe Halo Matan Delek Bele Hare, We Matan Batismo Halo Ema Sai Ema Foun “ Ha’u fiar Naí. Nia hakneak iha Jesus nia futar oin”

Timor Post - Relijiaun
  • Share
Imajen Ilustrasaun, Jesus Kura Ema Matan delek

(Reflexaun badak ba domingo IV tempu kuaresma nian. 1Sam. 16, 1-6-7,10-13; Sal. 22; Ef. 5, 8-14; Jo. 9, 1-41)

Hosi : Luis Pereira SJ

ADVERTISEMENT
SCROLL FILA BA NOTISIA


Kontexto!           

Ita tama ona ba  semana dahát ita nia eskola quaresmal nian. La kleur tan ita hakat tama ona ba Paskua. Leitura Datoluk/evanjelho Saun João haktuir kona-bá Jesus, nia discipulo sira, ema matan delek ida no fariseu sira. Wainhira Jesus kura ema matan delek ninia matan, nia discipulo sira pergunta no hanoin katak nia delek tamba nia salan ka pekadu ou nia inan-aman sira nia salan. Fariseu sira fali, questiona no la simu kona-bá kura ne’e rasik. Tamba, Jesus halo fali iha loron sábado.

Ita deskobre dinámika ida: matan delek hetan fali matan diak. Maibé, sira ne’ebé matan diak, sai fali matan delek. Katak, sira delek espiritualmente tamba deít egoista: hanoin –an deít; legalista : kaer metin lós deít ba lei; ignorância no foti-an.

Ponto 3 ita bele reflete!

  1. Fiar!

Saun Paulo nia surat ba sarani sira iha Efeso apresenta Jesus núdar Roman Mundo nian. Nia mai atu liberta ema sira ne’ebé terus no susar. Nuné, ita bolu nia Libertador. Ho lia-fuan seluk, ita dehan Nia mai lori salvasaun ba humanidade. Nuné, ita bolu nia Salvador.

Ema matan delek ne’e, fiar iha Jesus núdar messias ida. Tan ne’e, nia bele hetan libertasaun husi Jesus. Milagre akontece tamba nia obedece ka tuir saida mak Jesus husu nia atu halo, katak ba fasé-an iha we matan SILOÉ (Siloé katak enviado).

Fiar signifika simu Jesus-Kristo núdar Salvador. Fiar iha Jesus-Kristo signifika simu Jesus nia pessoa núrdar Kristu no Salvador no halo tuir saida maka Nia dehan ka halo tuir nia doutrina sira. Tamba ne’e, fiar mak ‘chave ida’ ba kura ne’ebé Jesus halo ba matan delek ne’e nia matan.

Nia HARÉ fali, tamba, nia konfesa katak nia fiar iha Jesus. Nuné, kredo matan delek ne’e nian mak: HA’U FIAR NAI.  Ikus mai, nia laós deít fiar Jesus, maibé, nia lao tuir Jesus. Nia lao tuir Naroman nia hun, Moris nia hun (Ha’u mak Naroman, Lia-Lós no Moris).

  1. Jesus haré ita ema!

Evangelista haktuir katak Jesus mak ida ne’ebé haré uluk matak delek ne’e. Nia haré núdar ema ida (humano).  Maibé, nia eskolante sira fali haré delek ne’e hanesan sala nain ida. Tamba, tuir sira, sofrimentu/terus mosu tamba pekadu/salan.

Hanoin ida hanesan ne’e, nia perigu mak ita bele monu iha esquema teologia falsu ida. Katak, Maromak mak kastigo ema. Ita mós dala ruma rona ema dehan Maromak kolen ona atu hadomi. LAE. Maromak la kastigu ema ida. Nia mós la kolen atu hadomi ita.

Tamba, “DOMIN” mak Maromak nia-an/nia SER. Nia mak Domin. Tan ne’e, sá mak nia halo mesak deít iha forma domin. Ita bele haré domin Maromak nian ne’e iha pessoa Jesus nian.

Matan delek ne’ebé foin hetan kura husi Jesus ne’e, hetan iha Jesus naroman foun, esperança foun, mundo foun, no realidade foun ida ne’ebé durante ne’e la existe iha nia moris. Ida ne’e, loke posibilidade ba sai ema foun no moris foun ida. Iha ita nia batismo, ho mina sarani, ita sai ema foun iha Jesus.

  1. Mudansa iha Moris!

Lisaun kmanek ne’ebé ita aprende husi Saun Joaun mak FIAR IHA JESUS TENKI LORI MUDANSA iha ita nia jeitu HARÉ (modo de olhar). Ita nia mundo ohin loron halo ita ansi an atu HARÉ.

Ita hakarak HARÉ buat hotu iha tempo ne’ebé hanesan. Ladun ona kapas iha silêncio (Ita gradualmente lakon ona paciência no kapacidade atu hela iha silêncio nia laran), para wituan, hakmatek, atu husik ita nia realidade HARÉ ita no absorba ita.

Ita gosta haré no halo komparasaun, examina, fahe malu ba grupu kík, ba partidu, sukat forsa, fahe kadeira nst. Nuné, haré ida ne’ebé monu iha ambitu hatun malu, odiu-malu, nst. Tamba ne’e, Jesus mosu hanesan ida ne’ebé halo ita HARÉ.

Hanesan mestre ida ne’ebé kura no lori naroman atu ema ida bele deskobre ninia-an rasik, ninia identidade rasik núdar ema no sai naromam ba ema seluk (imi mak masin rai nian no roman mundo nian).

Tempo quaresma konvida ita atu ativa no halo konversaun ida ba ita nia jeitu HARÉ.  Preciza purifika ita nia modo haré katak haré ida ne’ebé mos, gratuita no laiha interese pessoal. Basá, arte husi moris konsiste iha HARÉ buat hotu ho matan fuan nian.

Tamba ne’e, fuan deít mak iha matan ida ne’ebé hatene lia-lós no halo matan exterior bele haré beleza Nai Maromak nian. (Saun Jerome: The face is the mirror of the mind, and eyes without speaking confess the secrets of the heart).

Tempu quaresma mós, bele sai tempu kmanek ida atu ita rona, konversa ho Jesus. Atu Nia kura ita nia “delek kik sira” ne’ebé ita ida-idak iha.

Husik Jesus sai Naroman ba ita iha tempo agora. Ita husu grasa atu Jesus “muda ita nia jeitu haré/modo de olhar” ba ita nia realidade (Nikos Kazantzakis: Since we cannot change reality, let us change the eyes which see reality).

Mai ita hakoak valor sira hanesan: respeita malu, hadomi malu, hamrik iha lia-los, laran-luak, haraik-an nst. Só nune’e de´it mak ita bele halo quaresma ida ne’e sai “projeto de vida” ida, no “modo de proceder” ida, ba ita ne’ebé hakarak loke an, hodi hetan tebes naroman husi Na’i Jesus rasik, no Na’i Jesus nia roman duni.

Tan ne’e, ita nia chave mak FIAR iha Jesus no HARÉ nia núdar roman (luz) moris ita nian no hananu ho Salmista:Naí ha’u nia dalan diak; ha’u sei la hetan susar. Amen!(lupersj)

(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!)

 909 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “We Matan Siloe Halo Matan Delek Bele Hare, We M…” A few seconds ago
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error: