DILI (timorpost.com) – Padre Pároku Igreja Nossa Senhora Maria Imaculada da Conceição Katedrál Dili, José Antonio da Costa, hakotu ona iis iha Hospital Nasionál Guido Valadares (HNVG), Kuarta (28/12), iha oras 02:15 madrugada.
“Ita-nia Padre José António da Costa, ohin Kuara (28/12), iha oras tuku 02:15, mak hakotu iis iha Hospital Nasionál Guido Valadares,” dehan Padre Leandro Maria Alves, hafoin enkotru ho família matebian iha salaun Katedrál, Kuarta (28/12).
Nia dehan, hafoin Padre José António da Costa, hakotu iis, iha oras tuku 6:00 liu no to’o iha igreja Katedrál iha tuku 07:30.
“Ohin ami no parte Dioseze, reprezente Kardeal hamutuk ho família atu ko’alia no haree posibilidade ida ne’ebé mak di’ak ba família mós ba Igreja, atu haloot Padre José António da Costa nia isin mate,” nia informa.
Tanba ne’e, tuir desizaun ne’ebé ohin foti husi família no parte igreja nian sei haloot iha Semitériu Na’i lulik sira nian iha Maloa.
“Desizaun ohin, iha loron Sesta (30/12), iha tuku 09:00 dadersan Misa funebre, hafoin remata Misa sei haloot ita-nia padre José António da Costa iha Semitériu Maloa,” nia hateten.
Nia dehan, parte igreja sei halo oráriu ba loron ohin ho aban, atu reza nian, tanba ne’e, parte igreja husu ba sarani ho maluk sira hotu, atu reza iha igreja Katedrál.
“Padre José António da Costa, sai Pároku tinan barak nia laran, tanba ne’e ami parókia Katedrál sente triste, tanba lakon tan padre di’ak ida”, nia hateten.
Enkuantu tuir observasaun online Timor Post iha terrenu iha oras tuku 08:45, matebian Padre José António, nia isin mate tau ona iha igreja Katedrál Laran.
Nune’e iha oras tuku 08:50, Dom Virgílio Cardeal da Silva do Carmo SDB, to’o iha igreja Katedrál hodi hasa’e nia orasaun.
1,812 total views, 3 views today
