DILI (timorpost.com) – Arsebispu ba Arquidioseze Dili, Dom Virgilio Kardial do Carmo da Silva SDB, husu ba juventude sira kria pás no estabilidade iha loron boot Natal no Ano Novo, atu fuan no laran moos hodi simu Jesus Kosok Oan.
“Ha’u husu ba juventude no komunidade sira iha Timor laran tomak tempu natal ho ano novo presiza kria pás, unidade no amizade ho fuan no laran moos hodi simu Jesus kosok oan ne’ebé mai moris iha ema ida-idak nia fuan”, Arsebispu Arquidioseze Dili Dom. Virgílio Carmo da Silva ba jornalista sira iha Lecidere Dili, Sesta (23/12).
Lideransa igreja katólika ne’e dehan, natal no ano novo ne’e nakonu ho domin hodi hatudu ba malu atu simu Jesus kosok oan mai atu hametin ida-idak nia fraternidade iha sosiedade no nasaun nia laran.
Natal ne’e momentu importante ba ema hotu atu halibur malu, kria pás no moris iha ambiente ne’ebé hakmatek hodi selebra Jesus nia moris.
“Ida ne’e hatudu mai ita hodi hadomi malu respeita malu no rona malu moris tuir Maromak nia ukun fuan sanulu hadomi ema seluk hanesan ita nia-n rasik”, Arsebispu hateten.
Ikus Dom Virgílio husu ba juventude sira iha natal nia laran labele ódiu malu, labele tuda malu, labele oho malu no labele hafunu malu, ida ne’e la’ós espíritu natal nian no la’ós juventude katólika nian.
Natal ida ne’e buka hakbesik ba Maromak ho fuan no laran mós hodi simu Jesus kosok mai moris iha ema ida-idak nia fuan no laran hodi hetan salvasaun.
1,403 total views, 3 views today
Bele hare Video Seluk :
Subscribe to Timorpost
