DIILI (timorpost.com) – Estudante husi Universidade Nasionál Timor Lorosa’e (UNTL), Fakuldade Medisina no Siénsia Saúde ((FMCS), Departamentu Parteira, Imaculada Maria Luisa da Costa Pereira, sente kontente bele kanta salmo iha santa misa ne’ebé selebra hosi Sua Eminénsia Dom Virgílio do Carmo da Silva iha Tasi-tolu.
Estudante orijen Rejiaun Administrativa Espesiál Oe-Kusi Ambenu (REOA), ne’e sente oportunidade ida ne’e hanesan priviléjiu boot ida ne’ebé sei la repete tan iha nia vida moris.
“Ha’u Simu telefone husi Padre Idelfonso Xavier (PIX), katak prontu ka lae atu kanta salmo iha misa iha loron 6 fulan Setembru tinan 2022, ha’u laiha hanoin naruk ho kontente simu no hatán prontu”, nia hateten ba Timor Post online iha Uma Adat Tasi-Tolu, Tersa (06/09).
Nia konta, durante ne’e nia treinu salmo hamutuk ho kantór sira hotu iha salaun Katedrál durante semana rua.
“Nune’e ha’u Sente kontente atu lori salmo ba misa agradesimentu ida ne’e, tanba hetan oportunidade atu haksolok hahí no hanai ba Na’i Maromak nu’udar Sarani katólika ne’ebé primeira-vés iha Kardeál”, nia hateten.
Portantu tuir Informasaun hosi komisaun organizadór ba eventu ne’e, katak Santa Missa sei marka prezensa hosi reprezentante Bispu hosi Nasaun viziñu Indonézia nian liuliu Nusa Tenggara Timur (NTT), Atambua no Kupang, Austrália no sarani sira hosi Dioseze Dili, Baukau no Maliana.
Iha Santa Missa ne’e, tuir ajenda katak hafoin palavras boas vindas hosi Prezidente Komisaun Organizadór, Padre Guilerminho da Silva, sei iha mós diskursu hosi Primeiru Ministru, Taur Matan Ruak no Bispu Dioseze Maliana, Dom Norberto do Amaral.
Missa agradesimentu ne’e realiza iha oras tuku 16h00 to’o 18h00 kalan iha Tasi-tolu, no ikus liu sei Taka ho konsertu múzika Espirituál iha oras tuku 19h00-23h00.
Tasi-tolu naran ne’ebé foti hosi lokalizasaun lagoa boot tolu, partense ba Aldeia 12 Outubru, Suku Komoro, Postu Administrativu Dom Aleixo. Parte Leste Kapitál Díli, nu’udar entrada estrada protokolu ba Munisípiu Likisá, Ermera, Maliana no fronteira Atambua.
Tasi-tolu la’ós foun iha istória Timor-Leste, ohin Kardeál dahuluk Timor-Leste nian hamriik iha altar hanesan ne’ebé uluk hamriik ona hosi Santo Padre, João Paulo II, iha 12 Outubru 1989, hodi selebra Santa Missa ba sarani sira.
Iha loron ohin Tersa (06/09), hanesan loron ksolok ba Timoroan tomak, tanba Kardeál dahuluk rai Timor ninia oan rasik, Sua Eminénsia Dom Virgílio Kardeál do Carmo SDB, sei hala’o misa boot ba sarani sira.
5,164 total views, 3 views today
Bele hare Video Seluk :