Maromak Garantia Ita Nia Futuro
Povo nia moris tenke iha garantia ida … maibe laiha garantia ida nebe seguro liu duque garantia hosi Maromak (v 15a). Tamba ne’e, labele buka garantia hosi ema, riku soi’n, força hosi grupo balu, osan ka lider ruma. Garantia ida hanesan ne’e la fo segurança ba ita nia futuro. Atu hetan garantia hosi Maromak, nia condição mak ne’e “ estabelece justiça iha odamatan ba José nia resto”. Odamatan boot atu tama (porta de entrada) símbolo aplicação ba lei iha sociedade nia moris. Lei mak hanesan odamatan ba profeta Amos, tamba ne’e quando odamatan mak aat ema no sasan sira iha uma laran la seguro laiha garantia, ema aat, naok ten bele tama estraga. Ema la respeita ona lei, ne’e hanesan ita sobu rahun tiha ona ita nia odamatan, povo nia moris laiha ona sigurança. Justiça iha poder nia okos no lei sai fali instrumento ba poder politico sira, no sira usa atu halo buat nebe fo vantagem ba sira no ba sira nia grupo. Tamba ne’e tenke hafoun (restaura) ba iha instituições juridica sira atu nun’e labele iha suborn
o iha tribunal. Tribunal fatin nebe atu ema bele hetan justiça maibe dala barak sai fali fatin injustiça. Tamba bele acontece, povo kiik ida nebe na’ok deit manu ida, ka aifarina hun ida, nia bele tama kedas cadeia, maibe sira nebe iha poder na’ok osan milhão ba milhão sei la tama cadeia. Ba profeta Amos buat nebe nia hakarak bolu atenção no interesante mak ne’e convida ema hotu atu fila fali prática no moris iha ordem moral no ordem juridica ida nebe lós no mós, iha nação nia laran.
Justiça No Pecado Social
Profeta Amos la foca ba direito civil sira hanesan ba rai, ka produto ruma maibe direito civil nebe nia foca mak povo nia moris rasik, la’os buat material. Tamba ne’e se iha exploração ba ema kiik, kiak no beik, ne’e hanesan oho ema (ato assassinádo). Hanoin hirak ne’e lori profeta Amos to’o iha refelxão teológica ida ne’e, garantia ema seluk nia direito ba moris, vale liu ba Maromak inves reza adora ho hananu furaksira(cf. 5:21-25). Iha ne’e Amos la’os deit crítica situação social política, maibe nia crítica mos religião ka teologia. Realmente lideres religião sira mantem distância ho governo no la halo crítica ba governo. Nia hakarak lideres religião no ema diak sira nebe iha nação ne’e, tenke trata assunto justiça no lia lós. Tamba injustiça, corrupto ka buat aat oioin nebe mosu iha nação ida, la’os tamba ema aat mak barak demais ona, maibe tamba ema diak barak mak taka ibun lakohi koalia konaba justiça no lia lós. Sira nonok deit tamba tauk lakon estatus social nebe iha, tauk lakohi terus ba lia lós n
o hakarak hela nafatin iha zona seguru. Ba Amos ida ne’e mak bolu pecado social katak pecado nebe oho ema barak nia futuro,tamba ne’e mak nia hakarak hafoun (restauara) situação corrupto sira ne’e atu bele cria fila-fali condição ida nebe diak hodi hamoris futuro foun ida nebe justo liu ba ema hotu.
Refleção Crítica ba Situação Real iha Ita Rain
Questão real mai ita atu conciente no hatene;oinsa povo nia condição moris iha ámbito social política democracia iha Timor Leste. Povo sei continua moris iha situação economia ida nebe la seguro… seguransa ba aihan, ba saúde pública, ba condição serbisu público. Maske nune’e ita mos labele pessimista ba ita nia futuro politico no democracia iha ita nia nação. Maibe ita mos lakohi povo continua moris iha injustiça iha seitor hotu-hotu, liu-liu iha seitor justiça, lei tenke certeza ba ema hotu, condições serbisu ba ema hotu atu hamoris economia kiak sira nian iha nação ida nne’e.
Lideres religiosos sira labele hanoin katak religião ho política hela iha uma ketak ka sei kotuk bamalu. Profeta Amos hatudo mai ita causas corruptos acontese iha cultura política democracia iha nação nia laran, tamba instituição moral (religião la sai dalan ka ponte) atu hatudo direção nebe lós, no dala ruma sai fali causa ba corrupto iha nação nia laran. Ida ne’e ponto importante ida mai ita atu reflete, liu-liu konaba religião ninian função iha política no democracia iha nação ida ne’e. Atu lideres religioso sira hamoris nafatin sira nia função profética. Religião no lideres religioso sira mantém relações ho elementos crítica social, política nebe iha atu nune bele muda situação social política nebe aat iha nação ida ne’e.
Precisa hamoris poderes local sira nia função (lia nain / adat sira), tamba sira mos elemento filtro ida ba sociedade nia vida moral. Iha Timor ita harahun dadaun ona ita nia elemento filtro ida ne,e ho ideologia democracia no direito hosi rai liur. Hahu kedas ho primeira legislatura nebe ukun hosi partido Fretilin, hili ketua adat sira tuir ideologia democracia. Tamba ne’e ema sira nebe laós lisan adat nian sai ketua adat hodi ukun comunidade, halo sociedade sai rungranga la fiar malu iha comunidade nia laran, la fiar adat nebe hili liu hosi dalan democracia. Timor nia lisan ida ne’e mai kedas hosi bei ala sira, tama ona iha ema timor nia ruin no dolen. Português mai ukun tinan 450 nia laran, nia la sobu lisan ida ne’e, Indonesia mos mai ukun durante tinan 24 nia laran nia la sobu nia apoio no hamoris tan. Maibe wainhira timor ukun an ita rasik mak sobu no harahun ita nia lisan hodi adora ema la’o rai sira nia ideia no rai seluk nia ideologia.
Justiça tradicional precisa hamoris, tamba ida ne’e dalan ida nebe facil no lais atu povo kiik no kiak sira bele hetan lalais justiça no bele resolve lais sira nia problema moris iha sira nia comunidade no bele moris iha dame. Ohin loron buat kiik bót ita bolu deit mak polícia, ba tribunal atu resolve ita nia problema uma laran, ita haluhan ona ita nia abut ita nia lisan nebe bele contribui no tulun ita atu resolve ita nia problema moris lor-lorn nian. Ita halo ita nia moris sai complicado, moris ne’e rasik complicado ona maibe ita aumenta tan. Ita haluhan no finge haluhan ita nia cultura NAHE BITI BOOT. Se ita hamoris ita nia justiça tradicional ema iha Cadeia sei minus, osan barak sei usa atu hadia povo nia moris economia sai diak liu tan, inves de fo han deit ema nebe han toba iha Cadeia.
Maibe ita hotu tenke moris no hela iha conciéncia coletivo ida, nebe bele tulun ita iha ita nia serbí ba malu iha aspeto hotu, iha nação ida ne’e, “hakribi buat aat no hadomi buat lós”.
Hakerek Na’in Hanesan manorik Iha: Instituto Superior de Filosofia e de Teologia (ISFIT), Fatumeta – Dili, Email: luisgovei@yahoo.com.
2,996 total views, 27 views today
Bele hare Video Seluk :
Subscribe to Timorpost
