ADVERTISEMENT

Lia-fuan Fila hikas Ba Aman no Dalan Ba Lalehan Nakloke Ona Ba (Umanidade) “Jesus Foti Liman Hodi Harai bensa Ba Sira”

Timor Post - Relijiaun
  • Share

(Reflexaun badak ba domingo Solenidade Ascensaun Jesus nian.

 Act. 1,1-11; Sal. 47; Ef. 1, 17-23; Lc. 24,46-53).

ADVERTISEMENT
SCROLL FILA BA NOTISIA

Husi Luis Pereira, SJ

Kontexto:

Nai Maromak tun mai husi Lalehan no hit an fali ba Lalehan liu tiha Nia kompleta ninia misaun salvasaun nian ba umanidade. Lia-Fuan fila hikas ba Aman Maromak ne’ebé  mak haruka Nia mai. Ita preciza horik hamutuk ho Naí Moris Hias no glorifika Nia liu husi fiar no sakramento sira no buka mak sasan sira husi Lalehan nian. Basá, ita nia uma lolós mak iha Lalehan. Naí nia hit an ba Lalehan mak ita nia esperansa ba gloria. Jesus rasik dehan “iha ne’ebé Ha’u iha ba, Ha’u nia atan sira mós sei ho Ha’u”.

Jesus hit an ba Lalehan la signifika nia husik ita. Nia horik ho ita iha ema sira be hamlaha, hamrók no sira ne’ebé terus no preciza tulun. Saída deít mak ita halo ba ita nia maun-alin sira maski kik oan, ita halo ba Nia. Se ita unido ho Kristo iha mundo ne’e, hadomi Nia, Serbi Nia hanesan Nia hakarak ita atu halo, Nia mós sei unido ita ho Nia iha Lalehan. Se ita moris iha karidade, solidaridade, iha espírito domin nian, entaun, Ida ne’ebé tur iha Aman nia sorin kwana sei dehan ba ita “mai, rahun diak ba ita”.

Maromak hadomi tebes nia kriatura-kriasaun. Domin ida ne’e mak domin rohan laek. Maibé, ita kriatura mak la konsegue ‘kapta’ lolós no di-diak domin Naí Maromak nian ne’e. Ita hakarak fali sai hanesan Maromak katak hola fali Naí Maromak nia fatin (Kriador). Nuné, ita nia bei-ala sira: Adaun no Eva lori ita monu tiha ba salan. Salan nia hun mak mai husi ‘hakarak sai Maromak’. Konsekuensia husi ne’e mak ita nia dalan, ita nia uniaun-komunhaun, ita nia domin ho Maromak kotu, rahun, naksalak no ita lao dók tiha husi Maromak. Maibé Maromak kontinua hadomi ita kriatura-kriasaun. Domin ida ne’e, hatudu liu husi Maromak nia LIA-FUAN ne’ebé hola isin ema nian (ENKARNASAUN) atu soi ita/atu ‘resgata’ fila fali ita husi salan nia ukun. Ida ne’e mak inicio husi projeto salvasaun Aman Maromak nian ba umanidade.

Lee Mós:
Solenidade Loron Corpus Christi, Kardinál Virgílio Husu Sarani Hadomi Ambiente

Ita celebra Festa Solenidade Ascensaun(hit an) Jesus nian ba Lalehan hatudu katak Jesus kumpri ona nia misaun iha rai/mundu ne’e no fila hikas ba Nia Aman, ita nia Aman mós nia uma/Lalehan. Ida ne’e mak tempu IKUS Lia-Fuan husik hela projeto Salvasaun iha mundu ba servisu kontinuasaun Espírito Santo nian. Nuné, molok Nia husik mundu ne’e, Nia konfia hela misaun: haklaken Lia Foun Diak  ba nia discípulo sira. Nia dehan: “Imi ba mundo tomak hodi haklaken Lia Foun Diak ba ema hot-hotu. Ema ne’ebé fiar, hodi simu Baptizmu, ema ne’e hetan duni rahun diak”. Ita hotu ne’ebé simu ona Batizmu, ita hetan grasa ne’e, liu husi Apostolu sira.

Ponto 3 ita bele reflete, medita no aprende husi Festa Solenidade Ascensaun Jesus nian ne’e: dalan ba Lalehan loke ona; forsa mate nian lakon ona nia kbít; no misaun kontinua.

  1. Dalan Lalehan Loke ona!

Jesus nia fila hikas ba Aman Maromak (Lalehan) LOKE hikas fali ba ita ‘DALAN’ atu lao ba Aman Maromak. Ita nia dalan ba Aman Maromak KOTU tiha ho Adaun no Eva nia salan no ho Jesus-Kristu (Adaun Foun), loke hikas fali dalan ne’e. Linguazem simples kontextualizadu mak Jesus VIABILIZA  hikas fali relasaun Aman Maromak nian ho ita ema. Simplesmente ita bele dehan katak ita iha ona dalan ba Aman Maromak. Ita iha ‘kareta diak ida ho kondutor profesional ida’ (laos kareta roda tolu) ne’ebé sei lori ita ba diresaun Aman Maromak nian. Importante ba ita passageiro mak KONFIAR/FIAR iha ‘kondutor’ ne’e.

  1. Forsa mate nia lakon nia kbít!.
Lee Mós:
Pe. Venâncio Hadomi Natureza Hahú Husi Buat Ki’ik

Jesus ninia hit an ba Lalehan hatudu katak MATE LAKON ONA nia forsa/ukun. Jesus-Kristu (Adaun Foun) nia terus, mate no moris hias, nia harahun ona forsa mate nian. Iha Nia, ita hotu ne’ebé terus, mate, hetan ona esperansa katak ita sei moris hias fali iha loron ikus hanesan Jesus-Kristu hatudu ona. Ne’e esperansa certeza no absoluto ida ba ita sarani fiar nain. Basá, laiha ema ida bele hasai, ‘ezonera’ ida ne’e husi ita.  Ne’e grasa esperansa nian ida!

  1. Misaun kontinua!

Jesus-Kristu husik hela ninia misaun ba nia discípulo sira no ba ita. Ita hotu ne’ebé sarani ona, simu mós misaun ne’e: imi ba mundu tomak, hodi HAKLAKEN LIA-FOUN DIAK ba ema hotu. Pré-kondisan ba misaun ne’e mak konhese Jesus diak liu tan, hadomi nia klean liu tan no lao tuir nia besik liu tan. Oinsá? Iha dalan barak. Dalan ida baziku no importante liu mak LE BIBLIA. Ita hahu misaun ne’e husi ita nia uma laran, ita nia vizinho, ita nia aldeia, suku, município nst,. Ita hotu mesak deít discípulo/a misionario/a Jesus-Kristu Moris Hias nian.

Misaun ida ne’e, ita la halo mesak basá ho Jesus nia fila hikas ba Aman Maromak nia uman, husik hela ba ita ‘Terceira Pessoa Trindade nian: Tulun Nain. Nia mak sei kontinua misaun salvasaun nian ho funsaun ‘santifika’ kriasaun/humanidade ne’ebé ‘Segunda Pessoa Trindade nian’ soi ona. Iha saun Paulo nia karta ba sarani sira iha Efesus (Ef 1, 17-23) hatur katak Espírito Santo mak ida ne’ebé Naí Maromak haraik ba ita núdar Naroman no matenek atu bele hatene lolós Naí Maromak. Kreda hamrik metin tambá serbisu Espírito Santo nian. Ita bele konhese, hadomi no lao tuir Jesus-Kristu tambá mós Espírito Santo nia serbisu. Ita moris iha tempo ni-nian. Nuné, ita preciza loke fuan no neon atu husik nia horik/permanece no serbisu iha ita nia an. Só nuné deít, mak ita bele iha certeza absoluto ida ho esperansa katak Naí Maromak hadomi ita, Nia fo nia Oan Mane Mesak atu soi ita no ema hotu ne’ebé fiar iha nia Oan Mane Mesak ne’e sei hetan moris rohan laek ou sei ba hamutuk ho Aman Maromak iha Lalehan. Iha Nia, Lalehan no mundo laós ona realidade rua ketak-ketak maibé realidade ida deít. Jesus dehan: Ha’u ba uluk atu prepara fatin ba imi. Iha ha’u Aman nia uman, iha fatin naton ba ema hotu. Dalan ba Lalehan Nakloke ona no ita hotu simu bensa husi Naí. Amen!

Lee Mós:
Santo Inácio de Loyola: Pekador, Konvertido, Soldado, Peregrino no Santo “Hare buat hotu foun iha Kristo”

(Hakerek nain Jesuita, hela iha Monserrat-Kasait, Liquiçá no Full-time lecturer iha Instituto São João de Brito (ISJB), Kasait-Liquiçá!

 188 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Lia-fuan Fila hikas Ba Aman no Dalan Ba Lalehan…” A few seconds ago
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Live Streaming
Live Streaming TImor Post TV
x
Varanda
Kategoria
Video
Buka
Watch
error: