Rekrutamentu Traballadór ba Qatar Iha Prosesu Trata Visa   

by -1.200 views
Diretór Manager Incanto Group, Joanico Jerónimo

(Reportajen Estaziadu Cardenio Alves/Editor Mateus da Cruz)

DILI (Timor Post)- Prosesu rekrutamentu ba traballadór Timoroan atu ba Qatar, daudaun ne’e la’o hela no agora tama ona iha fase trata visa servisu ba timoroan, nune’e iha fulan Juñu ka Jullu tinan ne’e, traballadór balun sei arranka ba Qatar hodi hahú servisu.

“Prosesu atu lori Timoroan sira ba servisu iha Qatar-Dubai la’o hela, agora daudaun sei konvoka prosesu ne’e ho ministériu negósiu estranjeiru no kooperasaun atu haree prosesu visa servisu nian ba iha Qatar-Dubai,” hatete Diretór Manager Incanto Group, Joanico Jerónimo, iha nia knaar fatin Lesidere, Sesta, (29/04).

Nia hatete, agora sei iha fase prosesa visa tanba durante ne’e Qatar no Dubai seidauk apropriadu ho sistema visa Timor Leste no seidauk rejista iha nasaun sira ne’e.

Tanba ne’e, ministériu negósiu estranjeiru TL sei ko’alia ho governu Qatar no Dubai iha Jakarta kona-ba prosesu visa nune’e bele rejista hodi dezloka Timor oan sira ba servisu iha nasaun ne’ebá.

“Daudaun ne’e Ajénsia Cammer PC ho Ajénsia Jobs Global servisu nafatin ba prosesu sira nee,  hodi buka hela fatin ba kliente Timor-oan sira ne’e, fiar katak fulan Jullu ka Junhu bele dezloka sira ba servisu ona”, nia hato’o.

Antes ne’e, Ajénsia Cammer PC ho Governu reprezenta  ho Sekretáriu Estadu Formasaun Profisionál no Empregu (SEFOPE), Ministru Komérsiu Indústria, Ministru Negósiu Estranjeiru (MNE) ba ona iha Qatar no Dubai hodi haree kondisaun servisu sira ne’e no sente fatin ne’e fó seguru ba Timor oan sira atu servisu.

Iha loron 20 Maiu, Prezidente Jobs Global sei mai vizita Timor, hodi haree no kria fila-fali prosesu online karik Timor oan ne’ebé mak ba servisu liu husi online.

“Daudaun nee Timor oan sira ne’ebé halo ona interview ho kompañia sira iha Qatar no Dubai  kuaze atus rua no sira ne’e mai ho rezultadu di’ak tanba ne’e husu ba sira ne’ebé mak seidauk hetan interview, haree prepara aan ho di’ak liu husi lian English tanba servisu ba saláriu iha Qatar no Dubai depende ba ita nia skill,” nia hakotu.

No More Posts Available.

No more pages to load.