Rekoñese La halo Buat Barak, Prezidente TLPU: “Ha’u defende imi to’o GMN hasai Ha’u,”

by -186 views

DILI—Prezidente Timor Leste Press Union (TLPU) periodu 2016-2019, Francisco Belo Simões da Costa afirma, durante nia parte assume responsabilidade ida ne’e, la halo buat barak, maibé konsege defende direitu jornalista sira ne’ebé hetan kazu iha instituisaun mídia sira.

“Ami rekoñese la halo buat barak, la halo formasaun ba membru sira, maibé ba oin sei di’ak liu tan ho estrutura foun,” Francisco afirma kestaun ne’e iha nia diskursu badak abertura kongresu nasional TLPU, iha loron Sábadu (21/12/2019), iha Hotel Golgota, Dili.

Nia hatete, kazu ne’ebé TLPU infrenta durante ne’e maka kazu Timor Post hasoru eis Primeiru Ministru Rui Maria de Araújo, kazu GMN hasai jornalista sira, no defende jornalista sira ne’ebé hetan violasaun ba sira nia direitu iha mídia privadu sira.

“Saida mak ami halo, labarak, maibé advokasia firme, bainhira simu kna’ar ne’e, ami hahú ho infrenta kazu Raimundo Oki nian, saida mak estrutura halo, kontaktu efetivu tebes iha rai laran no rai liur,” Francisco haktuir.

Durante infrenta kazu sira ne’e, Francisco dehan, difikuldade ne’ebé durante ne’e estrutura hasoru maka, iha membru balun mak laiha solidariedade ba malu.

“Tanba ha’u nia ulun moruk maka, ha’u prontu simu konsikuensia, i ha’u prontu sai husi GMN, GMN la partisipa. Ba oin ita tenke koñese malu di’ak liu tan,” eis Xefe Redasaun iha mídia privadu GMN ne’e.

“Membru sira kona problema ita ida-idak haree ba ita nia bikan laran. Ita sira tur iha ne’e balun hola parte iha hasai membru sira husi GMN,” nia lamenta.

“Ami la halo buat barak, ami la halo servisu, ne’e ami rekoñese, maibé hatudu ba públiku ezisténsia TLPU ne’e iha,” Francisco salienta.

Entretantu Sekretáriu Jerál TLPU, Manuél Pinto mós rekoñese, estrutura la funsiona durante mandatu.

“Ne’e la’ós tanba laiha kapasidade, maibé tanba tempu. Ami dependente intermu finansial. Ami dependénsia ba governu, tanba ne’e ami nia kreatividade menus,” Manuél hatete.

“Ami rekonese mos laiha disiplina organizasaun,” nia dehan.

Maske nune’e, atuál Vise Prezidente Ajénsia TATOLI ne’e fi’ar katak, ho kongresu ba dala ida ne’e, estrutura foun sei halo di’ak liu servisu ba TLPU.

Kongresu ba dala ida ne’e hala’o ba-dala lima ona. (cao)

No More Posts Available.

No more pages to load.