Rejolve Problema Bee iha Dili no Sansaun ba Konsumidor Ilegal

by -74 views
Prezidente BTL, EP, Carlos Peloi

Jornalista Jaime Pires / Noémio Falcão

DILI (Timor-Post)—Bee Timor-Leste (BTL, EP) deteta ona problema bee iha sidade Dili liuliu ligasaun ilegal sira mak fó impaktu boot ba ema hotu labele hetan nesesidade báziku ne’e ho estavel.

Durante hala’o servisu ne’e, BTL rejista komunidade iha Aldeia Bekusi, Suku Bekora, Postu Administrativu Kristu-Rei mak dada bee ilegal barak liu.

Ho problema ne’e, Prezidente BTL, EP, Carlos Peloi ba Jornalista sira iha Ministeriu Finansas, Aitarak Laran, Sesta (06/08) subliña, hafoin nia parte identifika ona problema hotu kona-ba krize bee moos iha Dili, aplika kedas sansaun ba atividade ilegal sira.

Nia hatete, bee komesa menus no maran iha Dili tanba, ema dada ilegal ho meius oioin, balun uza bomba liga direa ba kanu distribuisaun fó impaktu boot tebes.

Carlos konfirma, iha kapitál Dili depedénsia liubá bee husi rai okos nia, tanba bomba hamutuk 26 iha Dili laran ne’e mós ladún halo operasaun másimu tanba liga mós ho eletrisidade nia forsa tanba eletrisidade tun sa’e bomba mós labele halo buat ida.

Nune’e mós sira halo ligasaun ilegal liuliu ligasaun direita ho kanu boot entaun iha Dili laran maioria ema liga ilegal hanesan iha Bekusi ne’e deteta barak loos.

“Kazu iha Bekusi ne’e  foin dadaun ne’e maran durante semana ida resin tanba ami halo limpeza ba ligadau ilegal sira ne’e, no deteta barak loos,” Nia deklara.

Nia reforsa, tanba komunidade balun kestiona no balun telefone direita dehan, sira bee maran maibé balun bee kontinua iha no bee boot nafatin, tanba ne’e mak ekipa sa’e ba halo limpeza ilegal sira ne’e.

Tanba uluk sira la halo ilegal komunidade sira iha Bekusi hetan hotu ne’e hanesan, maibé komesa halo ligasaun ilegal entraun balun, bee menus no balun naran tanba ema barak mak halo ilegal depois uza tan bomba ilegal.

“Ita halo limpeza no ita konsege hakotu hotu ligasaun ilegal sira ne’e, entaun agora ne’e komesa la’o normál fali ona iha ne’ebá”, Nia hatutan.

Kona-ba fó sansaun ba sidadaun sira halo ligasaun ilegal ne’e nia dehan, iha dekreutu lei ne’e iha, sansaun ida mak fó Avizu ba sira hodi hakotu ligasaun ilegal sira ne’e liuliu sira ne’ebé uza mota-bomba ne’e tesi tiha kanu ne’ebé mak sira liga.

“Sansaun segundu mak prende sira nia mota-bomba sira ne’e, tanba ne’e tekniku sira tun hodi husi sira nia konsiensia se bele ida-idak hasai sira nia bomba ilegal husi kanu distribuisaun sira ne’e, sé sira la hasai mak ami hasai no prende hotu”, Nia hakotu.

No More Posts Available.

No more pages to load.