Reitór Rekoñese Joven Ida Mate iha Likisá Estajiáriu UNPAZ, Polísia Deteta Lanu

by -1.781 views
Imajen ne'e hatudu komunidade sira ba haree matebian iha fatin akontesimentu. Foto Espesial

DILI (Timor Post)—Reitór Univesidade da Paz (UNPAZ), Adolmando Amaral rekoñese joven mane ida ho naran Carmonízio da Silva Gomes Amaral mate iha área Pilila, Munisípiu Likisá,  Domingu kalan (25/10/2021) maizumenus tuku 00:25, nu’udar estudante estajiáriu.

Matebian Carmonízio da Silva Gomes Amaral husi Suku Luka, Munisípiu Vikeke mate ho kondisaun molik latan hela iha fatuk laran tasi ninin área Pilila.

Ba Timor Post, Reitór Adolmando haktuir, matebian nu’udar estudante husi departementu saúde públika ho nia kolega sira universidade  koloka ba estájiu hela iha Suku Maumeta, maibé matebian hala’o viajen la husu lisensa ba nia xefe grupu.

“Ohin, fakuldade saúde públika, dekanu ho estrutura ba akompaña iha mortuáriu halo autópsia. Ita hein katak ne’e murni kecelakaan ka oinsá depois mak ita hatene,” Reitór hatete.

Entretantu Komandante Munisípiu Likisá, Superintendente Umbelina dos Santos Soares haktuir, nia parte halo ona identifikasaun ba matebian no prosesu legal la’o dadauk.

“Matebian refere hodi kalan iha sede suku Maumeta mak nia sa’e fali ba Aldeia Maumetalau ba nia maluk estájiu sira i foti nia kolega nia motor Mio Beat kór mean-mutin,” Komandante Umbelina haktuir.

Nia hatutan, matebian nia objetivu viajen husi Likisá ba Dili maka iha dalan klaran hetan asidente. No bazeia ba investigasaun matebian lanu.

Hatan ba Timor Post kona-ba matebian latan iha fatin akontesimentu laiha roupa, Komandante Umbelina hatete, investigasaun la’o hela. (cao)

No More Posts Available.

No more pages to load.