Reitór João fó Posse ba Dekanu FEST no FFSH

by -306 views

DILI (Timor Post)-Universidade Nasionál Timor-Lorosa’e (UNTL) nia Magnífiku Reitór, Profesór João Soares Martins, fó pose ba Dekanu foun husi Fakuldade, Enjeñaria, Siénsia no Teknolojia (FEST), Profesór Adalfredo G. da Silva Ximenes, no fó pose mós ba Dekanu Fakuldade Filozofia no Siénsia Umana (FFSH), Profesór Martinho Borromeu, ba mandatu tuir mai, iha Auditóriu FEST-Díli, (24/09).

Tuir informasaun ne’ebé Timor Post, asesu hosi portál ofisiál UNTL, Magnífiku Reitór, Profesór João Soares Martins, dezeja katak ho knaar ne’ebé Dekanu iha bele fó importánsia ba funsionamentu Fakuldade nian.

“Knaar Dekanu nian mak fó importánsia maka’as ba Fakuldade nia funsionamentu atu lori Universidade nia naran, hanesan servisu ba siénsia no teknolojia ne’e Fakuldade Enjeñaria mak bele halo, tanba ne’e, mak ita ne’e uniku tebes iha sosiedade nia leet”, hateten Reitór.

Iha fatin hanesan, Dekanu sesante FEST nian, Profesór Dr. Junior Raimundo da Cruz, agradese ba Magnífiku Reitór, no mós eis Dekanu FEST nian ne’ebé fó konfiansa hodi assume knar durante fulan 6 ne’e.

“La haluhan agradese ba Magnífiku Reitór, no mós eis Dekanu Profesór Ruben ba konfiansa tomak fó mai ha’u hodi assume responsável hanesan Dekanu, Interinamente durante fulan 6 nia laran”, tenik Profesór Junior.

Iha sorin seluk, Dekanu eleitu Profesór Adalfredo G. da Silva Ximenes, agradese ba dosente sira tanba fó ona konfiansa hodi lidera FEST ba períodu tuir mai.

“Atu lidera Fakuldade ida ne’e atu sai sentru Exelénsia, Kualidade no Profesionál, tuir nesesidade UNTL nune’e sei hametin liután kooperasaun ho JICA nu’udar parseiru ba Fakuldade nian” tenik Dekanu.

Iha sorin seluk, Profesór Martinho Boromeu, ne’ebé simu pose hanesan kontinua dekanu iha FFSH, hateten, durante mandatu sei garante no asegura prosesu Ensinu, Peskiza, Prestasaun Sosial no Seluk tan.

“Juramentu ne’ebé ohin Padre Kapelaun sai sasin ba ami hanesan Dekanu, husi hau mak hanesan atu asegura Ensinu, Peskiza, Prestasaun Sosiál inklui estrakurikulár, kooperasaun no seluk tan”, tenik Profesór Borromeu.

Serimónia ne’e partisipa husi Visereitór, Proreitór, Diretór, Dekanu, Eis Dekanu FEST sira, Padre Kapelaun UNTL Pe. Nívio Lebre Correia, Fdcc, Diretora-Jerál Ensinu Superiór nian, Dra. Maria Filomena Lay Guterres, no konvidadu sira. (*/rio)

No More Posts Available.

No more pages to load.