Reitór Foun Simu Pose, MESSK Dezafia Muda Estatutu UNTL

by -945 views

Timor Post (27/01/2021)-João Soares Martins, Sesta (29/01) sei simu knar ofisial nu’udar reitór foun Universidade Nasionál Timor Lorosa’e (UNTL), hodi substitui reitór sesante Francisco Miguel Martins ba períodu (2021-2026).

“Ha’u simu ona konvite hosi konsellu jerál (UNTL) nian atu fó pose ba reitor foun eleitu ba periodu 2021 to’o 2026 nian iha sesta feira loron (29/01), dadeer tuku sia”, informa Ministru Ensinu Superior, Longinhos Dos Santos, ba jornalista sira iha Palasiu Governu, kuarta (27/01).

Governante adianta, governu sei dezafia reitór foun atu halo revizaun ba lejizlasaun UNTL ninian balun liu-liu kona-ba  rejime karreira dosente sira nian no estatutu tanba kondisaun balun la kondís ona.

“Estatutu UNTL ne’e halo aliterasaun tinan 10 liu ona, ne’ebé iha kondisaun balun ne’ebé mak la kondís ona ho dekretu lei no estatutu UNTL ninia rasik, hanesan fakuldade ne’ebé mak hakerek iha estatutu ne’e fakuldade 7 iha altura ne’ebá, maibé agora daudaun ne’e UNTL iha fakuldade 9 mak funsiona, entaun la kondís ona ho estatutu ka situasaun ida ne’e.”, adianta Ministru.

Kona-ba rejime karreira dosente nia Ministru dezafia oinsá reitór foun halo revizaun ba lejizlasaun balun, hanesan halo ajustamentu ba sira (dosente) nia grau akadémika no mós iha esperiénsia servisu ne’ebé mak prensa ona rekizitu.

Entretantu João Soares Martins hili ba reitór foun UNTL períodu 2021-2026 iha loron 3 fulan Dezembru 2020, liuhosi prosesu eleisaun iha estrutura Konsellu Jerál UNTL.(Jornalista: Jaime Pires, Editor: Mariano Martins)

No More Posts Available.

No more pages to load.