Rede Feto Lansa Krítika Hasoru Prosesu Ezonerasaun ba Élia no Diriji Pergunta Tolu ba Taur Matan Ruak

by -99 views

DILI—Rede Feto Timor Leste lansa krítika hasoru Primeiru Ministru Taur Matan Ruak relasiona ho desizaun ba ezonerasaun Élia Antonia dos Reis Amaral husi kargu Vise Ministra Kuidadu Saúde Primária.

Rede Feto konsidera prosesu ezonearsaun ne’e sai hanesan pergunta boot ba organizasaun ba feto timoroan sira ne’e tanba laiha sala boot husi Élia durante nia asumi nia kna’ar iha luta inísiu kontra atake viruss corona (COVID-19).

Liuhusi komunikadu ba imprensa ne’ebé Timor Post asesu, Segunda (06/04/2020), Rede Feto afirma, situasaun atuál iha rai laran la’ós ameasa mai de’it husi pandemia COVID-19, maibé problema  saúde barak mak governu tenke responde regularmente, vasina ba inan no oan, maternidade, infermaria, no seluk tan.

Tanba ne’e, Rede Feto hatete, ezonerasaun ba Vise Ministra Élia la devia akontese.

Iha komumnikadu ba imprensa ne’e Rede Feto husu ba Primeiru Ministru Taur Matan Ruak atu fó resposta ba públiku rajaun lolo’os husi prosesu ezonerasaun ne’e.

“Tanba saida maka la inklui Ministra Saúde Interina iha ekipa Task Force? Tanba saida maka demita Dra. Élia husi nia kargu? Prosesu saida mak halo ona hodi ikus halo desizaun hodi ezonera Dra. Elia Amaral husi nia kargu?,” pergunta sira Rede Feto nian.

Rede Feto nia haree esforsu hirak ne’e sidauk maximu, hodi nune’e Rede Feto apoiu tomak desizaun governu forma ekipa Task Force hodi atua situasaun COVID 19 iha Timor-Leste. Tanba iha situasaun difisil presiza tebes timoroan sira tenki hamutuk atu funu kontra COVID-19 iha Timor-Leste.

Iha oportunidade Rede Feto apela ba nai-ulun sira, atu valoriza kultura fó dignidade ba malu liuliu atu fó dignidade ba inan feton sira, karik sira neon sala, iha prosedimentu oioin atu hadi´ak.

Rede Feto mós hakarak apela ba ema hotu katak, momentu Kuarezma momentu importante ba ema hotu atu hadera aan, refleta Jezús nia terus hodi bele moris hias hamutuk ho Kristu.

Rede feto, hanoin iha situasaun apertada COVID 19, ema hotu moris iha dezeperu nia laran. Na´i ulun sira, imi mak Maromak nia saseluk, sai bibi-atan di´ak ba Maromak nia bibi oan sira. Keta halo sira-nia fuuk lhan ida mós munu. Tan nasaun ne´e nia di´ak depende ba imi-nia jestaun.

Rede Feto Rekoñese, nuúdar umanu, laiha ema ida perfeitu maibé Rede Feto triste tebes ho desizaun lais ne´ebé Primeiru Ministru foti hasoru ami-nia feto maluk, sein konsidera meus seluk hanesan xamada  atensaun ka notifikasaun prévia ruma.

Rede Feto konxiente katak luta ba igualdade, la fásil maibé lori tempu tan ne´e kualkér demisaun ka izonerasaun injusta ba feto hanesan insultu boot ba feto sira.

Rede Feto hakarak fo hanoin ba Lideransa Nasaun Timor-Leste hotu, atu hamutuk buka dalan hodi komunika efikás no jere problema sira ho ulun malirin hodi fokus ba pandemia COVID 19.

Ho tulun Aman Maromak nian, Na´i Jezus nia Futar Fuan Santu, Na´i Krús Joven, Inan Virjen Soibada, Ramelau no Inan Peregrina no mós Anjo no Santu sira hotu, ita bele iha komunikasaun di´ak nakunu ho domin no amizade, atu ita idaidak, ita-nia Rai doben, no mundu raiklaran bele konverte no livre hosi perigu COVID 19. Aproveita Kuarezma no krize  ida-ne´e hodi halo reflesaun klean hodi hamriik filafali ho espíritu no abnegasaun serbí nian, liuliu ba ita maun alin no ita Rai doben. (cao)

No More Posts Available.

No more pages to load.