Reativa Programa Alfabetizasaun

by -79 views
Ilustrasaun

DILI (Timor Post) —Embaixadór Timor-Leste ba Cuba, Eusébio Corsino de Araújo, kompromete sei komunika ho Governu Cuba hodi reativa programa alfabetizasaun.

Nia hatete, programa Alfabetizasaun ne’e di’ak tebes, tanba bele tulun timoroan sira, maibé programa refere remata ona iha tinan 2015.

“Ba alfabetizasaun ita iha etapa primeiru ona no falta segunda etapa, segunda etapa ne’e atu halo hanesan edukasaun ba adultu para fó kontinuidade,” Eusébio informa hafoin reuniaun ho Primeiru Ministru Taur Matan Ruak, iha rezidénsia ofisial Faról, Sesta (23/07).

Maibé, nia dehan iha alfabetizasaun ba adultu ne’e, sei ba koordena nafatin ho Cuba, para sira mós mai atu bele fó fila fali formasaun ba ema timoroan rasik, para bele fó fila fali formasaun ba sira adultu.

Eusébio hatutan, sira sei koordena filafali ho Governu Cuba, tanba programa ida ne’e prioridade ba Timor-Leste.

“Programa ida ne’e prioridade ida ba ita-nia rain, porké ita hatene katak alfabetizmu ne’e mak kria obskurantismu,” nia hatete.

Tan ne’e nia dehan, Timor-Leste atu sai husi obskurantismu nia laran, presiza alfabetiza no presiza prepara povu.

“Ami ba koordena ho Governu Cuba, depois atu deside ne’e husi Ministériu Edukasaun bainhira mak ita atu fó kontinuidade”, nia hakotu. (jry)

No More Posts Available.

No more pages to load.