Re-patria Hosi Malázia, Timor-oan 73 Iha Ona Karantina

by -290 views
Situasaun Aeroportu Prezidente Nikolao Lobato, Domingu, (18/4/2021) hafoin Timoroan 73 to'o iha TL. Foto TP/Lili

(Reportájen Ollan Soares/Editor Suzana Cardoso)

DILI (Timor Post) – Hamutuk Timoroan nain 73, inklui ho Timoroan ida ne’ebé deporta hosi Malázia, to’o iha Aeroportu Prezidente Nicolao Lobato, Dili. No husi Ministeriu Saúde (MS) asegura ona ba iha hotel 10 ne’ebé dezigna ona.

“Ita konsege rezolve ona sidadaun nain 73 ne’ebé tama ona mai Timor Leste (TL). No aviaun Malindo tula fali sidadaun hosi Dili ba Malázia hamutuk nain 96. Timoroan ne’ebé tama ona mai, sei ba hotu kuarentena iha hotel ne’ebé governu liu hosi MS dezigna ona.”

Hateten Reprezentante Ajensia aviaun Malindo Chartered Flight, Pedro Carascalão ba jornalista iha Aeroportu Internasionál Nikolau Lobato Komoro, Domingu (18/04). Hotel hirak ne’e mak hanesan; Hotel Fortuna, Timesquer, Vila-verde, Meimart no hotel hirak ne’e aseptu Hotel Timor ho Novo Horizonte. Sidadaun re-patria hirak ne’e maioria mane. Nain ida katuas. Iha feto nain rua. Feto nain ida seluk, isin rua.

Hanesan públika tiha ona iha jornál Timor Post, edisaun Sesta, (16/4/2021) no edisaun Sabadu, (17/4/2021) hateten, Timoroan hirak ne’e mai husi nasaun oin-oin. To’o iha aeroportu Malázia, aviaun Malindo ne’ebé aluga husi emprezariu Timoroan, Pedro Carascalão hetan kansela tanba seidauk hetan lisensa Flight approval husi governu RDTL.

Nune’e tuir lolos Timoroan hirak ne’e tenki to’o iha TL, loron 16 Abril 2021 maibé tenki adia to’o loron 18 Abril 2021 hafoin governu RDTL fó lisensa ba aviaun Malindo mak iha loron Domingu, (18/4/2021) hamutuk Timoroan 73 nee foin to’o iha Aeroportu Nicolao Lobato, Dili.

Pedro Carascalão esplika liutan, Timoroan re-patria hirak ne’e balun husi Korea to’o iha Aeroportu Malázia la sai. Tanba ameasadu ba prizaun. Hamutuk iha ekipa ida, Ajensia Aero Timor fasilita sira to’o konsege fila mai TL ho kondisaun diak.

“Ami hanesan ajensia Aero Dili, aluga aviaun Malindo aproveita hodi tula traballador 35 hosi Korea. Timoroan hosi UK mós lubuk ida. Balun seluk husi Lisboa no Indonézia. Maioria ho rajaun fila mai TL tanba familia foin lalais hetan impaktu husi inundasaun,” katak Pedro.

Tanba Timoroan hirak ne’e husu ajensia air Timor para bele fasilita sira fila mai TL katak Pedro, mak ajensia aluga fali aviaun Malindo ne’ebé pela primeira ves mai Aeroportu internasionál Nikolau Lobato Komoro ne’e tula sira fila mai TL.

Katak Pedro, Timoroan sira selu billete ho folin baratu kompara ho folin billete ho aero Atlantiku sira seluk ne’ebé to’o deit iha Lisboa. Enkuantu Aviaun Malindo too iha Malázia. Nia ramu barak los maibé nia presu baratu.

Malindo Malázia iha rua. Ida ho numeru 737900 kapasidade tula pasazeiru 180. No ida seluk ho numeru 737800 ho kapasidade pasazeiru hamutuk nain 160 mak tula Timoroan 73 mai TL ne’e. Maibé tanba Covid-19 mak kadeira klaran husik mamuk. Pasajeirus mós redus barak.(Lee Notísia kompletu iha Jornál Timor Post)

No More Posts Available.

No more pages to load.